Mudzimai weMazuva Ekupedzisira, Chikamu Chechipiri

Chidzidzo 18
■ Chii chamunoda kwegore rimwechete? Chii chiri kuitwa nemhuri
yenyu kugadzirira kudya, mbatya, nezvemoto zvinotora gore?
Chii chimwe chamungakwanise kuita?
Utano hweNyama
Miviri yedu yenyama inoera, uye zvakakosha kuti tiichengete yakachena,
yakasimba iri mitano. Tinofanira kutevera mirau chaiyo yekuva
neutano hwenyama hwakanaka. Sekuratidzwa kwazvakaitwa muIzwi
reUchenjeri, tinofanira kudya zvidyo zvinovaka uye tisatore zvinodhaka,
fodya nezvimwe zvinhu zvinokuvadza (onai D&Z 89).
Kudzivirira chirwere tinofanira kuchengeta dzimba dzedu nezvivanzi
zvakachena uye tichiwana mishonga yenhomba inokurudzirwa
munzvimbo medu. Tinofanira kuwana zororo rakanaka, tinofanira
kusimbisa miviri nguva nenguva, maererano nezvinodikanwa zvedu
nezvatiri. Patinochengeta miviri yedu iri mitano tinokwanisa zvirinani
kuriritira zvinodikanwa zvedu nekubatsira vamwe.
■ Sei tichida miviri yakasimba? Sei zvakanyanya kukosha kuti vachava
ana amai vachengete utano hwavo? Chii chatingaite kunatsa utano
hwemhuri yedu? (Onai chidzidzo 21, “Kuronga Kudya Kuzere
Utano,” nechidzidzo 22, “Kuchengetwa KwaAmai neMucheche,”
mubhuku rino.)
Utano hweMweya, Pfungwa, neMagariro
Tinofanira kuzvisimbisa pachedu nemhuri dzedu pamweya, pfungwa,
nemagariro. Patinoita izvi tinozova takagadzirira zviri nani kugadzirisa
matambudziko nekusuwa. Mukuru Boyd K. Packer vakati:
“Zvakanga zvakarongwa kuti upenyu hunozove chiedzo. Kuve tinotambudzwa
nekunetseka, kusuwa, nekugumbuka, kunyange kukundikana
kunowanikwa. ...
“Kana [ukave] . . . nezuva rakaipa neimwe nguva, kana akawanda akatevedzana,
. . . mira wakadzikama utarisane nawo. Zvinhu zvinozotwasanuka.
“Pane chinangwa chikuru mukutambudzika kwedu muupenyu” (mu
Conference Report, Kubvumbi 1978, p. 140; kana Ensign, Chivabvu
1978, p. 93).
Panouya zviedzo, tinofanira kuda, kutsigira, kuyemura, nekukurudzira
vamwe mumhuri. Mukubatsirana, tinokudziridza simba repfungwa
kukunda matambudziko azvino neachauya.
Mukuru Marvin J. Ashton vakataura nyaya inotevera yemhuri yakakudziridza
simba rerudzi urwu:
Mwanasikana mudiki akakuvara urozvi zvakanyanya pakuzvarwa uye
haana kumbokwanisa kukura kana kusvika zvaaifanirwa kunge akaita.
157