Enpresa bioteknologikoak sortzeko eragile erabakigarriak ... - Euskara

1. Kapitulua: Ikerketaren sarrera 9
Industria dinamizatzeko eta etorkizunera begira garapen iraunkorra eduki ahal
izateko beharrezkoa da OTEBen sorketa EAEn. Agente askoren lana izango da OTEBen
sorketaren dinamikan baliabide guztiak ipintzea (Goñi 2003).
Ekintzaile teknologikoek eta hauek sortzen dituzten OTEBak, paper
garrantzitsuagoa bete behar dutela azpimarratzen du PCTI 2010 dokumentuak, eta
bultzada handitu behar dela ere hau lortzeko. Ildo horretan, etorkizuneko sektoreetan
sortzen diren enpresen kopurua gehitzeaz gain, enpresa horiek mundu globalizatu baten
lehiatu behar dira. Modu proaktiboan sortu nahi diren OTEBen helburuen artean,
dimentsioa funtsezko elementu bat da. Enpresa mota hauetan, proiekzio globala izatea
ezinbestekoa da, eta horretarako premiazkoa da masa kritikoa eta merkatu global
horretan kokatuko dituen dimentsioa izatea (Eusko Jaurlaritza 2007).
1.3 IKERKETAREN METODOLOGIA
1.3.1 Gizarte zientziak
Frantziako Iraultzak eta XVIII. mendeko Europako krisi sozialak gizarte
zientzien sorrera ekarri zuten: soziologia, ekonomia, psikologia, zuzenbidea eta
pedagogia bezalako zientzia berriak orduko gizartearen desorekari irtenbide bat ematera
zuzenduak zeuden.
Gizarte zientzien sorrerarekin batera bi korronte filosofiko kontrajarri sortu
ziren: positibismoa eta korronte hermeneutikoa. Lehenengoek zientziaren ikuskera
galilearra zuten, Hume, Francis Bacon, Auguste Compte, William James eta J. Stuart
Mill autoreekin. Ezagutza bat, ezagutza zientifiko gisa kontsideratu ahal izateko,
zientzia naturalen paradigmara egokitu behar zuen nahitaez. Korronte hermeneutikoak
berriz, Droysen, Dilthey eta Max Weber buru zituela, matematika fisikoa azalpen
zientifiko ororen erregulatzaile izateari, eta monismo metodologikoari uko egiten
zioten, besteak beste. Gizarte zientzien berezko metodoa “ulermena” dela azpimarratzen
du korronte honek, beraz gizarte zientziek ez dute azalpena lortu nahi baizik eta
ulermena.
Ikertu nahi diren arazo, teoria berri eta ikertzailearen ekarpenek zientziaren
ikuspuntu edo kontzeptu baten aukeraketa baldintzatzen dute. Enpresa kudeaketaren
arloan funtsa gizakia bera denez erantzukizun altuko ikerketak dira.
Bioteknologia enpresak sortzeko eragile erabakigarriak Euskal Autonomia Erkidegoan