Enpresa bioteknologikoak sortzeko eragile erabakigarriak ... - Euskara

2. Kapitulua: Azterketa bibliografikoa 57
Aurretik enpresa bat sortu izanak ere eragin handia du enpresa berri baten
sorketan (Doutriaux eta Simyar 1987). Enpresa-sortzaileak lehendik enpresa sortu badu,
eginkizun horren bidean aurkituko dituen eragozpenak ulertzea ez zaio hain zaila
gertatuko. Orduko esperientzia ongi atera ez bazen, akatsak ez errepikatzen saiatuko da
hurrengo baten; ongi atera bazen, berriz, oraingoan hobetzen saiatuko da. Beraz, beti
dago zer ikasia aurreko esperientzietatik. Adituen iritziz, ekintzaile gehienek ez dute
arrakastarik handiena lehen enpresarekin lortzen, baizik eta gerora sortu duten beste
enpresa batekin baizik.
B. Profil psikologikoa
Ekintzailea, pertsonalitatearen berezko ezaugarrien bidez aurrez zehaztutako
jokabidea duen gizabanakoa bezala definitzen du Ganzarainek, garrantzi handiagoa
emanaz ezaugarri hauei kanpoko faktoreei baino. Horrela, ekintzailearen jokabidea
azaltzeko pertsonalitatearen bereizgarri batzuk existitzen dira, nahiz eta, ez egon
akordio garbirik hauek zeintzuk diren definitzerako orduan. (Ganzarain 2006)
Zentzu honetan hainbat ikerketa egin dira, McClelland (1961) izan zelarik
aitzindaria, Collins, Moore eta Unwalla (1964) eta Shapero (1971) autoreekin batera.
Aditu hauen ustez, pertsonaren berezko ezaugarriak oso eraginkorrak izan
litezke sortu den enpresaren etorkizuna arrakastaz bideratzeko.
Rodrigo Varela-k ekintzailearen ezaugarri, gaitasun eta abileziak azaltzerako
orduan egiten duen integrazioan lau dira kategoria nagusienak: motibazio faktoreak,
jokabide edo portaeraren ezaugarriak, ezaugarri fisikoak eta adimenezko ezaugarriak.
Autoreak, hamaika ikerketa oinarri hartuta egiten du proposamena (Varela 2001).
Ikerketa proiektu honetan kategoria hauek erabiliko dira ekintzailearen ezaugarriak
definitzeko. Horretarako, kategoria bakoitzeko elementu garrantzitsuenak hartu dira
kontuan, literaturak gehien aipatzen dituenak, hain zuzen ere.
B1) Motibazio faktoreak
Collins, Moore eta Unwalla izan ziren lehenak “independentzia premia”
identifikatzen eta bere erro psikologikoak aztertzen. Ekintzailearn pertsonalitateak ez du
autoritatea onartzen eta erakundeak dituzten berezko egitura iherarkikoetan lan egiteko
ezgaitasuna azaltzen du. Hortik dator bere autonomia eta independentziaren bilaketa.
Bioteknologia enpresak sortzeko eragile erabakigarriak Euskal Autonomia Erkidegoan