Enpresa bioteknologikoak sortzeko eragile erabakigarriak ... - Euskara

1. Kapitulua: Ikerketaren sarrera 20
Bioteknologia definitzerako orduan Ereky (1919), Brockhaus (1929), Gaden
(1962), Hutton (1979) eta Bull, Holt eta Lilly (1982) autoreen ekarpenak hartu dira
aintzakotzat. ELGE erakundeak gaur egun erabiltzen duen bioteknologiaren definizio
bakarra eta estatistikoa hartu dira erreferentzi moduan doktorego tesi honetan, aurretik
erakutsi den markoa jarraituz. Bioteknologia esparruko nazioarteko egoera argitzen da
Ameriketako Estatu Batuak (hemendik aurrera AEB), Kanada, Europa, Espainia eta
EAEko datuak alderatuz.
1.3.5.2 Informazio iturriak
Ikerketa honetan hainbat informazio-iturri kontsultatu dira proiektuari
dagozkion datuak lortzeko orduan. Bi taldetan banatu ditzakegu informazio-iturriak:
lehen mailako iturriak eta bigarren mailako iturriak.
Lehen mailako iturriak, elkarrizketak eta datu bilketa izan dira. EAEko
biozientzia eta bioteknologia enpresetako ekintzaile eta sektoreko administrazioko
buruekin alde batetik, eta ikerketa eta teknologia zentroetako eta finantza
erakundeetako arduradunekin egindakoak bestetik.
Bigarren mailako iturriak berriz, ekintzailetasuna, berrikuntza, oinarri
teknologikoko enpresa berritzaileekin eta bioteknologiarekin zerikusia duten liburu,
artikulu, dokumentu eta bestelako testuak izan dira.
1.3.5.3 Landa lana
Ikerketa proiektu honetan metodo kualitatibo eta kuantitatiboaren integrazioa
egin da, eta bi fase ezberdindu ditu.
Landa lanaren lehen fasean BioBasque Agentziarekin kontaktuan jarri eta gero,
biozientzien esparruko enpresetara bisitak egin ziren datuak jasotzeko asmoarekin.
Guztira 18 enpresa bisitatu ziren 2005. urteko maiatzetik 2006ko martxora arte.
Elkarrizketa ez-egituratuak erabili ziren alderdi kualitatiboa jorratzeko, biozientziak eta
bioteknologia, berrikuntza eta enpresa sorketaren inguruan hain zuzen ere. Lau faktore
hartu dira kontuan elkarrizketa hauek egiteko orduan: jarrera ekintzailea, ezagutza
zientifiko-teknologikoak, finantza-iturriak eta inguruneko agenteak. Ekintzaileek modu
ireki baten hausnartu dute planteatutako lau faktore hauen inguruan.
Bioteknologia enpresak sortzeko eragile erabakigarriak Euskal Autonomia Erkidegoan