Enpresa bioteknologikoak sortzeko eragile erabakigarriak ... - Euskara

1. Kapitulua: Ikerketaren sarrera 24
1.4 IKERKETAREN HELBURUAK
BioBasque 2010 estrategiaren diseinuak, asmo handiko eta aldi berean errealista
den eszenatoki bat ikuskatu nahi du 2010. urterako. Horretarako aukeratu den erantzuna
honakoa da:
“Nazioartean onartua den enpresa jarduera existitzea, non garapena kluster
bioteknologiko, enplegu eta aberastasuna sortzean oinarritzen den.”
(Eusko Jaurlaritza 2003)
Bisio honi buruz hainbat azalpen egin daitezke. Ikertzaileen masa kritikoa eta
azpiegiturak eratzeaz gain, sektorearen inguruan enpresa jarduera sortzeko bokazioa du,
eta gainera nazioarte mailan ezaguna izango dena. Horrela, ez da nahikoa sektorean
presentzia izatea, baizik eta teknologikoki aurreratua dagoen herrialdearen itxura eman
behar da. Asmo guzti hauek ongizate maila hobeago baten lorpenarekin lotuta daude:
enplegua, aberastasuna eta bizi kalitatea.
Helburuak ezartzeaz gain, bisioak sektorearen konfigurazioa nolakoa izan behar
duen zehazten du: “Kluster bioteknologikoa”. Horrela, baliabide eta ahalmenetan
oinarrituta eskala ekonomiak aprobetxatu behar dira lankidetza koordinatu baten
bitartez. Hau guztia kontuan hartuta, estrategiak helburu kuantitatibo batzuk ezartzen
ditu 2010. urterako: enpresa berrien sorketa (biozientzien esparru ezberdinetan jarduera
gauzatuko dituzten 40 enpresa berri) eta enplegu kualifikatua (enpresa sorketarekin
erlazionatua dago eta enplegu zuzena 1000 pertsonetakoa izatea nahi da).
Estrategia ikusita, ikerketa proiektu honetan ondoko helburuak planteatzen dira:
• Helburu Orokorra: EAEn bio-kluster bat sortzeko enpresa bioteknologikoen
sorrerarako faktore erabakigarrien identifikazioa, azterketa eta deskribapena.
• Helburu Zehatzak:
1. Ekintzailetasuna, berrikuntza eta bioteknologiaren azterketa bibliografikoa egin.
2. Ekintzailetasunaren adierazle nagusien azterketa egin GEM proiektua jarraituz.
3. Berrikuntza eta bioteknologia industriaren nazioarteko datuen konparaketa.
4. EAEko biozientzia sektorearen egituraketa eta deskribapena: jarrera ekintzailea,
ahalmen zientifiko-teknologikoa, enpresa sektorea eta agente eragile zuzenak.
5. EAEko enpresa bioteknologikoen karakterizazioa: Jatorria, ezaugarriak,
sektoreak eta produktuak, pertsonak, finantza-iturriak eta elkarlana.
6. EAEko ekintzaile bioteknologikoen karakterizazioa: Profil demografikoa,
motibazioa, formakuntza eta esperientzia.
Bioteknologia enpresak sortzeko eragile erabakigarriak Euskal Autonomia Erkidegoan