Gjuhësi Ballkanike

http://www.dielli.net
të shqipes. Kjo vërejtje do të vlente, jo vetëm po të pranohej mendimi që të folmet
jugore e kanë pasur këtë formë foljore, por edhe po të pranohej mendimi i përkundërt
(shih edhe & 23).
Por kjo çështje nuk duhet parë në mënyrë të sipërfaqshme. Në këtë rast, është e
nevojshme të përcaktohet, qoftë edhe në vija të trasha, periudha, gjatë së cilës duhet të
jetë ushtruar një ndikim i tillë. Duke qenë se kontaktet e drejtpërdrejta midis të folmeve
jugore të Shqipërisë dhe greqishtes u ndërprenë vetëm pas vitit 1912, kur u krijua shteti
i pavarur shqiptar, në parim duhet pranuar që ndikimi i supozuar i greqishtes në këtë rast
duhej të kishte vazhduar, të paktën, deri në atë kohë. Si rrjedhim, ky ndikim i supozuar
duhej të kishte penguar që në të folmet jugore të ndodhte një dukuri e përkundërt, siç
është mënjanimi, qoftë edhe i pjesshëm, i ndërtimeve me mënyrën lidhore nga ndërtimet
me formën e pashtjelluar të tipit për të bërë, e cila është zhvilluar kryesisht gjatë këtyre
katër shekujve të fundit, dhe përdoret më fort pikërisht në të folmet jugore (shih & 13).
E kjo rrethanë e mbulon me një hije të fortë dyshimi hipotezën e ndikimit të greqishtes
mbi të folmet jugore të shqipes në këtë pikë.
Pra, çështja e paskajores në gjuhën shqipe në përgjithësi dhe në të folmet jugore të saj
në veçanti mbetet gjithnjë e hapur, ashtu siç mbetet e hapur edhe çështja e zanafillës së
mënjanimit të kësaj kategorie foljore në gjuhët ballkanike, në përgjithësi (shih edhe &&
15-21).
147