62377

I. ATALA: 4. BRASILGO KOOPERATIBA ERREALITATEA GAUR
Esparru lokalean garatzeak dakar gertuko beharrekiko sentsibilitate berezia izatea: hezkuntza,
osasuna eta beste oinarrizko hainbat beharrekikoak, hala ere, honek lotura edo harreman estua
dauka baita ere, nazio eta nazioarte mailako dinamikekin.
Ekonomia Solidarioaren indartzeak honako hauek gainditu beharra dauka: sareak sortzea eta
esperientzien arteko artikulazioa batetik eta esperientzia zehatzen sendotzea eta zabalpena
bestetik.
4.2.5. Forma juridikoak
Ekonomia Solidarioa osatzen duten lan edo ekoizpen esperientzia hauek daude antolatuta talde
ez formal, elkarte, enpresa autogestionatu edo eta kooperatibetan.
Ekonomia Solidarioak ez du forma juridiko konkretu bat hartzea eskatzen baina bai sarritan
errepikatu ditugun hainbat ezaugarri betetzea: gestio kolektiboa, ekoizpen bitartekoen jabetza
konpartitua, autogestioa, partehartzea, lankidetza eta berdintasunean oinarritutako giza
garapena ardatz duten lan harremanak. Errenta eta lana lortzeko helburu duten ekimenak
izanik beharrezko dute sozietate edo enpresa izaera eskuratzea.
Ekonomia Solidarioaren baitako ekimenek merkaturako ekoizten dute eta euren produktuak
saltzen dituzte ekonomiako lehen, bigarren eta hirugarren sektorean: nekazaritzan, industrian
eta zerbitzutan. Honek esanahi du Ekonomia Solidarioko ekimenen inguruko politika publikoak
garapen ekonomiko iraunkorraren ingurukoak behar dutela izan eta ez laguntza sozialeko
konpentsazio politikoen baitakoak.
Talde informal eta elkarteetan antolatutako ekimenek muga politiko, ekonomiko eta sozialak
aurkitzen dituzte (PERES GEDIEL, JA, 2007). Talde informalek Kode Zibil Brasildarraren
arabera izaera juridikorik ez dutelako honako eragozpenak aurkitzen dituzte: hitzarmenak
sinatzeko ezintasuna, maileguak eskuratzeko zailtasunak eta ondasun eta zerbitzuak
merkaturatzeko zailtasunak. Jarduera aurrera eramaterako orduan ere hainbat elementuk
eragiten dute ekimenak ahulak eta segurtasun juridikorik gabeak izatea: merkatuan nahiko
salneurri baxuan eginiko eskaintza kontratuak, Estatuaren interbentzioa inolako berme
juridikorik gabe…
Elkarteak, 2002ko urtarrilaren 10eko Lei 10.406 arautzen ditu eta Kode Zibilak bertara igortzen
du. Aipatu legeak elkarteak zuzenbide pribatuko pertsona juridikoen mailan ezartzen ditu.
Legeak dioenaren arabera ekonomikoak ez diren helburuak lortzeko sortzen dira elkarteak.
Lortu nahi diren helburuak, izaera ekonomikorik ez izatearen ezaugarriak, eragiten du, entitate
juridiko hauek ondasun eta zerbitzuak merkatuan ezin komertzializatu ahal izatea.
133