62377

II. ATALA:
6. 4/93 LEGEAREN ETA 5.764/71 LEGEAREN ARTEKO ALDERAKETA
Aipatu berri dugunak lotura zuzena dauka ekintza kooperatiboarekin. Ekintza kooperatiboa da
kooperatibak euren artean edo kooperatibak bazkidearekin burutzen duen ekintza eta hortik
eratortzen da zerga exentzioa. Eta hauetaz gain ekintza kooperatibo kontsideratzen dira baita
ere, kooperatibaren objektua aurrera eramateko burutzen diren ekintzak.
ANTEAG-eko aholkulari juridikoak kooperatibaren kasuan kapital sozialak duen izaera eta
betetzen duen funtzioa zein diren azaldu digu. Bere azalpenetik ondoriozta dezakegu
kooperatibak pertsonen sozietateak diren heinean kapitala euren zerbitzura dagoen tresna dela
eta beraz, legeak derrigortasunez eskatzeak ez duela zentzurik. Gutxieneko kapital soziala ez
galdatzeko argudio hau ez da OCB-k duen argudioa.
Goazen orain UFDR-ko ikasleekin izandako elkarrizketek emandakoa aztertzera. Ikasleen iritziz
kapital gutxieneko bat eskatzea kaltegarria da. Euren ustez kapitala da hirugarrenen aurrean
berme funtzioa betetzen duen elementu bat. Lan bat lortzea da nahi dena kooperatiba sortzen
denean. Langilea bere buruaren jabe izatea eta ugazaba baten aginduak jarraitu beharrik izan
gabe bere lana burutzea da kooperatibaren helburua. Esandakoa kontutan izanik beraz,
langileak kapitala ipintzeko mailegu bat eskatu beharra badauka zorpetu egiten da lanean hasi
aurretik eta ondorioz, hirugarren batekiko mendekotasunetik askatzerik ez du lortzen. Beraz
hasiera-hasieratik ekimenari hasiera inon menpe jarrita hasi du.
Ikasle hauek kooperatiba nukleoko kide dira eta hori dela eta Ekonomia Solidarioko ekimenekin
egiten dute lan. Eurek egunero bizi duten adibidea bota du ikasle batek.
‘Catadores de Carton (papera biltzen dabiltzanak) deiturikoak esate baterako,
kooperatiba bat sortzea nahi badute behartuta daude norbaiti laguntza eskatzera.
Hauek kalean eskean dabiltzanak izan ohi dira. Pentsa dezagun dirua lortu dutela
kapital enpresek erantzukizun sozialerako duten dirutik edo bestela, bankuei maileguan
eskatuta. Hasieratik zorpetu egin dira. Ondorioz nik uste dut, Brasilgo kasuan eta
Ekonomia Solidarioko ekimenei begira legeak gutxieneko kapital soziala eskatzea
eragozpen bat dela. Handia gainera.
Esponsorren bidea aukeratzen baldin bada ere, berdin. Esponsorrak dirua ez bada
beste zerbait beti eskatuko du ordainetan’.
Kapitala ipintzerako orduan dagoen beste aukera bat interes baxuko kredituak erabiltzea
litzateke. Ikasleen esanetan, egon badaude. Baina mikro-kredituak emateko beharrezkoa da
berme edo garantia bat izatea. Brasilen dauden mikro-kreditu eskaintzak ekimen pribatutik
datoz eta hauek ezinbestean bermea eskatzen dute. Eta bermea ez dagoen kasutan interes
altuak eskatzen dituzte. Herri Ekonomietako Kooperatibentzako ez badago politika publiko
berezirik alperrik da; ezin baitzaie aurre egin ekimen pribatuak eskatzen dituen interes altuei.
159