62377

II. ATALA:
8. OCB EUSKAL INSTITUZIO KOOPERATIBOEN IKUSPEGITIK
Bestalde legearen aginduz, eraketa, bategite, banaketa, desegite eta berraktibazioen
inskripzioak izaera eratzailea izango dute. Gainerakotan inskripzioak adierazpenezkoa izango
da. Legetik datorkio beraz, erregistroari kooperatibak eratzeko ahalmena.
OCB-k bere estatututan jasotako hainbat eskuduntza: kooperatiben identitatea zaintzea;
kooperatiben erregistroa eta katastroa eramatea; kooperatibak sustatu eta laguntzea;
asistentzia eskaintzea; kooperatiben gaineko ezagutza bultzatzea; praktika kaltegarriak
ekiditea… hauek gurean erregistroak dituen eskuduntzak dira eta ez elkarte pribatu batek.
Inskripzioa beraz eratzailea da. Honetaz aparte, legezkotasuna legoke. Inskribatu beharreko
agiriak kalifikatu egingo dira eta horretarako kontutan hartuko dira agiriaren itxuraren
legezkotasuna, eta sinatzen dutenen legitimazioa, eta edukiaren, agirien ondorioen eta
Erregistroko idazpenen balioa, indarrean dagoen legeriaren arabera.
Publizitate formala da beste ezaugarri bat. Euskadiko Kooperatiben Erregistroa publikoa da.
Erregistroko liburuak eta idazpenek aipatzen dituzten agiriak erakutsiz egingo da publizitatea.
Beste ezaugarria publizitate materiala eta formala dira. Uste izango da erregistroko edukia
guztiek ezagutzen dutela eta beraz, ez da egongo ez ezagutza argudiatzeko aukerarik. Fede
oneko hirugarrenen aurrean beraz, efektu guztiak izango ditu.
Legitimazioa da beste printzipio bat. Erregistroko idazpenak zehatzak eta baliozkoak direla
jasotzen da eta eragingarriak izango dira harik eta zehaztasun-ezaren edo baliogabetasunaren
adierazpena inskribatzen ez den arte. Honek esanahi du erregistroak bere baitan duen
informazioa baliozkoa dela eta zalantzarik ez izateak trafikoari segurtasuna ematen dio.
Lehentasuna. Zernahi tituluren prebentziozko oharpena edo inskripzioa egiten bada, ezingo da
beste titulurik inskribatu, delako titulua, egun berekoa nahiz lehenagokoa izan, haren kontrakoa
edo harekiko bateraezina baldin bada.
Eta azkenik tratu jarraitua daukagu. Inskribatu beharreko subjektu bati buruzko egintzak edo
kontratuak inskribatu ahal izateko, subjektua bera inskribatuta egon beharko da aurretik.
Aztertu ditugun printzipioak bermatzen dute erregistroak bere funtzioak eta eskuduntzak beteko
dituztela. Hain zuzen ere, legeak emandako pribilejio hauek dira tresna beharrezkoak egitura
publikoak funtzio publikoak bete ditzan. Brasilgo kasuan Erregistro funtzioa zuzenean
Administraziko parte den egitura publiko batek bete beharko luke. OCB- moduko entitate
pribatu batek eskuduntza eta pribilejio hauek izateak ez dauka zentzurik, beharrezkoa delako
neutraltasuna izatea erregistroaren kalifikazio zereginak dituen egiturak.
309