Plani Mësimor dhe Libri i Mësuesit -Gjuha Shqipe

Sintaksë
Përcaktori kallëzuesor.
Ora e parë
Objektivat:
- Të dallojnë përcaktorët kallëzuesor të kryefjalës dhe të kundrinorit.
- Të njohin veçoritë e ndërtimit të përcaktorëve kallëzuesorë dhe të përcaktojnë me se janë
shprehur në fjali.
- T’i përdorin drejt përcaktorët kallëzuesorë.
Materialet mësimore: teksti i nxënësit, shkumësa, fletorja, etj.
Zhvillimi i mësimit
Hapi i parë. mësuesi shkruan në dërrasë të zezë fjalitë:
Mendime të turbullta i kalonin nëpër mendje.
Dy zogj fluturuan të trembur.
U kërkon nxënësve të gjejnë mbiemrat dhe të thonë çfarë funksioni luajnë në fjali dhe kë
përcaktojnë e plotësojnë ata.
Hapi i dytë. Mësuesi shpjegon funksionet e mbiemrave si përcaktorë në fjali dhe jep
ndryshimet mes tyre. Mbiemri (të turbullta) në fjalinë 1 përcakton emrin mendime, ndërsa
në fjalinë 2 mbiemri (të trembur) krijon një lidhje dyfishe: lidhet edhe me kryefjalën (Dy
zogj) dhe kallëzuesin (fluturuan). Në këtë rast mbiemri është në funksionin e përcaktorit
kallëzuesor. (me shigjeta)
Dy zogj fluturuan
të trembur
Mësuesi ndalet në shpjegimin e lidhjes dyfishe të përcaktorit kallëzuesor si plotësues i kallëzuesit
dhe kryefjalës ose kundrinorit njëkohësisht. Mësuesi jep shembuj për të dy llojet e përcaktorit
kallëzuesor duke u bërë të qartë nxënësve çfarë tregon secili prej tyre, më çfarë shprehen në fjali
dhe me cilat folje lidhen.
Hapi i tretë. Nxënësit për disa minuta lexojnë tekstin dhe për çdo paqartësi i drejtojnë pyetje
mësuesit i cili jep shpjegimet e nevojshme.
Hapi i katërt. Punë e pavarur. Ushtrimi 1. Kontrollohet dhe vlerësohet puna e nxënësve.
Përmbledhje e orës së mësimit.
Detyrë shtëpie. Ushtrime nga Fleta e punës.
Sintaksë.
Ushtrime për përcaktorin kallëzuesor.