Plani Mësimor dhe Libri i Mësuesit -Gjuha Shqipe

Drejtshkrim
Shenjat e pikësimit.
Përdorimi i shenjave të pikësimit
Ora e parë
Objektivat:
- Të njohin dhe të përdorin drejt dy pikat, thonjëzat, kllapat dhe vizat.
Materialet mësimore: Teksti i nxënësit, fragmente nga vepra të ndryshme letrare,
shkumësa, etj.
Metodat e mësimdhënies: Kllaster, teknika e pyetjeve, shpjegim, ilustrim, punë e
pavarur.
Zhvillimi i mësimit
Hapi i parë. Kllaster. Së bashku me nxënësit mësuesi realizon në dërrasë të zezë
kllasterin për shenjat e pikësimit. (pika, presja, pikëpresja, pikëpyetja, pikëçuditja, dy
pikat, tri pikat, viza, thonjëzat, kllapat.)
Shenjat e pikësimit
a- Hapi i dytë. Nxënësit duhet të plotësojnë skemën duke i ndarë në:
b- shenjat që përdoren në fund të fjalisë: pika, pikëpyetja, pikëçuditja, tri pikat.
c- Shenja që përdoren brenda fjalisë: presja, pikëpresja, dy pikat, kllapat, thonjëzat, viza.
Hapi i tretë. Teknika e pyetjeve.
Përse përdoren shenjat e pikësimit në të shkruar?
Cili është funksioni i tyre?
Kush e luan rolin e shenjave të pikësimit kur përdorim formën e folur të gjuhës?
Tregoni për çfarë përdoren dy pikat, kllapat, thonjëzat dhe vizat.
Hapi i katërt. Mësuesi shpjegon përdorimin e tyre.
Përdorimi i dy pikave (:)
Dy pikat shënojnë një pushim të gjatë ashtu si edhe pikëpresja, por ndryshe nga
pikëpresja dy pikat kanë vlerë logjike. Ato paralajmërojnë një shpjegim ose një varg
shembujsh.
Dy pikat përdoren në ligjëratën e drejtë, për të ndarë fjalët e autorit nga fjalët që
riprodhohen.
Përdorimi i kllapave ( )
Kllapat shënojnë një pushim të shkurtër, si presja. Ato shërbejnë për të dalluar, për të
shquar e për të veçuar një grup fjalësh brenda fjalisë, të cilat shprehin një sqarim a një
mendim të ndërfutur.
Përdorimi i thonjëzave dhe vizave “ ”, -
Thonjëzat dhe vizat shërbejnë:
Për të rrethuar fjalët e një a më shumë bashkëbiseduesve në ligjëratë të drejtë.
Për të shënuar emrat e rrugëve, institucioneve, organeve të shtypit etj.