Plani Mësimor dhe Libri i Mësuesit -Gjuha Shqipe

Drejtshkrim – sistem rregullash për t’i shkruar drejt e njëlloj fjalët në gjuhën letrare.
Drejtshqiptim – sistem rregullash për t’i shqiptuar drejt e njëlloj fjalët në gjuhën letrare.
2. Hapi i dytë. Mësuesi ndërton një tabelë në dërrasë dhe u kërkon nxënësve që të thonë cilat janë
bashkëtingëlloret e zëshme e cilat të pazëshme (të shurdhëta) në gjuhën shqipe.
Përgjigjet e tyre i shënon në tabelë dhe plotëson më tej tabelën.
Bashkëtingëllore të zëshme Bashkëtingëllore të pazëshme
b, d, dh, g, gj, v, x, xh, z, zh. p, t, th, k, q, f, c, ç, s, sh.
Më pas mësuesi u kërkon që t’i vënë përball njëra-tjetrës këto bashkëtingëllore duke krijuar çifte
të ngjashme.
Më pas mësuesi shkruan në dërrasë edhe një grup bashkëtingëlloresh të quajtura të
tingullta dhe u shpjegon nxënësve tiparet e tyre. Këto janë: j, l, ll, m, n, nj, r, rr.
3. Hapi i tretë. Hapen librat. Nxënësit për disa minuta do të lexojnë informacionin e dhënë në
tekst. Mësuesi shpjegon më tej rregullat e drejtshkrimit dhe drejtshqiptimit të bashkëtingëlloreve
të zëshme në fund e në trup të fjalëve. Jep shembuj për ilustrim. Mësuesi u tregon nxënësve librin
“Drejtshkrimi i gjuhës shqipe” i cili na vjen në ndihmë për drejtshkrimin dhe drejtshqiptimin e
gjuhës shqipe.
4. Hapi i katërt. Punë në dyshe. Ushtrimi 1,2 dhe 3, sipas kërkesës. Kontrollohet dhe diskutohet
puna e nxënësve, duke vlerësuar nxënës të niveleve të ndryshme.
5. Hapi i pestë. Punë e pavarur. Punohet ushtrimi 6. Sipas kërkesës.
Bëhet përmbledhja dhe vlerësimi për orën e mësimit.
Detyrë shtëpie. Ushtrimi 5.
Drejtshkrim
Bashkëtingëlloret nistore sh, zh, ç / s, z.
Objektivat:
- T’i shkruajnë dhe t’i shqiptojnë siç duhet bashkëtingëlloret sh, zh, ç/s, z në fillim të
fjalës.
Mjetet mësimore: teksti i nxënësit, shkumësa, “Drejtshkrimi i gjuhës shqipe”, etj.
Zhvillimi i përmbajtjes
1. Hapi i parë. Kontrollohen detyrat e shtëpisë. Lexim nga disa prej nxënësve. Diskutim
rreth tyre me klasën.
2. Hapi i dytë. Punë e pavarur. Ushtrimi 1. Nxënësve u kërkohet që të gjejnë fjalët e
shkruara gabim dhe t’i korrigjojnë.
Shfaros, çfaq, shdëmtoj, zhvendos, xhvat, çbëj, zhbllokoj, spjegoj, çpikje, shthur,shlodhje,
çjerr, e shrregullt, shmallem.
3. Hapi i tretë. Mësuesi kontrollon punën e nxënësve dhe bën korrigjimet e nevojshme.
Më pas mësuesi jep shpjegimet përkatëse për secilin prej shembujve duke u bërë të qartë
nxënësve rregullat e drejtshkrimit e të drejtshqiptimit të bashkëtingëlloreve nistore sh, zh,
ç / s, z. Për secilën prej bashkëtingëlloreve nistore jep shembuj për të ilustruar përdorimin
e tyre. Mësuesi mund të përdorë edhe “Drejtshkrimin e gjuhës shqipe”.