Plani Mësimor dhe Libri i Mësuesit -Gjuha Shqipe

√ + - ?
b) Diskutim në çifte (ose në treshe) dhe më pas në grupe. Nxënësit do të bëjnë plotësime
e sqarime midis tyre gjatë diskutimeve rreth çështjeve të hedhura në tabelë.
c) Sqarime për pyetjet dhe çështjet e ngritura nga nxënësit. Gjatë kësaj kohe mësuesi
plotëson më tej tabelën. Mësuesi duhet t’u bëjë të qartë nxënësve:
- Dy llojet e zgjedhimeve në gjuhën shqipe: vepror dhe jovepror.
- Gjatë zgjedhimit folja merr dy forma: sintetike dhe analitike. Forma sintetike –
ndryshimet gjatë zgjedhimit ndodhin në trup të foljes. Forma analitike – ndryshimet
formale gjatë zgjedhimit ndodhin jashtë trupit të foljes. Këto ndryshime realizohen me
anë të foljeve ndihmëse kam, jam dhe pjesëzave u, do, do të, etj.
- Klasifikimin e foljeve në zgjedhime duke u mbështetur në tingullin fundor të temave si
dhe në mbaresat vetore të kohës së tashme të mënyrës dëftore në formën veprore.
- Tri zgjedhimet, shembuj për secilin zgjedhim. Për ilustrim mund të përdoren ushtrimet
2 dhe 3.
3. Reflektimi. Punë në grupe.
Mësuesi ndan klasën në grupe dhe cakton detyrat për secilin grup.
Grupi 1 – ushtrimi 1. Nxënësit do të gjejnë foljet në tekstin e dhënë dhe do t’i ndajnë
sipas zgjedhimit përkatës.
Grupi 2 – ushtrimi 4. Nxënësit do të ndërtojnë nga dy fjali me folje nga të tri zgjedhimet.
Përfaqësuesit e grupeve japin përgjigjet e ushtrimeve. Përgjigjet diskutohen më gjithë
klasën.
Përmbledhje e orës dhe vlerësim.
Detyrë shtëpie. Ushtrimi 5. Nxënësit do të bëjnë një shkrim të shkurtër me temë “Në
shkollën time” ku të përdorin folje të të tre zgjedhimeve në të dy format.
Të lexuarit
Ferit Lamaj
Kush e hëngri mjaltin
Objektivat:
- Të identifikojnë personazhet e fabulës..
- Të diskutojnë për kujdesin që duhet të tregojmë ndaj njerëzve intrigantë..
‐ Të renditin disa nga mesazhet që trajtohen në këtë fabulë.
Mjetet e punës. Tabela e zezë, shkumësa me ngjyra, gjuha shqipe 7.
Zhvillimi i mësimit.
Hapi i parë. Lexohet detyra e shtëpisë. Nxënësit vlerësojnë njëri –tjetrin duke dhënë
mendimet e tyre.
Hapi i dytë. Mësuesi shtron pyetjet :
Ç’janë fabulat? A ju pëlqejnë? Përmendni disa fabulistë të huaj edhe shqiptarë.
Nxënësit japin informacionin e tyre mbi pyetjet e hedhura.
Hapi i tretë. Mësuesi vendos një nxënës për të lexuar fabulat e dhëna në tekst.