Bernard Boller, Gottschalk d'Orbais de Fulda à Hautvillers

Gottschalk d’Orbais
de Fulda à Hautvillers :
une dissidence
192
IX. annexes
Saginatus est occisus fratri meo uitulus,
Qui fuit peregrinatus a patre diutius,
Cum multis luxuriatus miser meretricibus,
Qui ad te ubi reuersus fuit mendicissimus
Consumptis paternis rebus atque bonis omnibus,
Indigens suilli uictus sed carens hoc funditus.
Inops panis, diues famis, ut est piis oculis
A longe respectus patris est donatus osculis,
Amplexatus et benignis uehementer bracchiis.
Aliud nil fuit fatus, ni quod esset filius
Eius ultra iam indignus, seruis a fidelibus
Prima stola est indutus inque manu anulus
Est confestim sibi datus, tegumenta pedibus
Pariterque saginatus est occisus uitulus
Sicque fuit epulatus tecum, pater, filius.
Ergo, quia est inuentus, fuerat qui perditus,
Rediit resuscitatus et reuixit mortuus,
Gaudio magno gauisus est cum seruis dominus.
Igitur ego ipsius nunc ad te, fraterculus,
Clamo tuis aduolutus, pie pater, pedibus
Tuus fateor indignus nihil minus filius.
Ecce (petit Godescalcus) ueniam sceleribus
Pro suis, offensum quibus te tristatur pluribus,
Quam polus ipse dipictus splendeat sideribus.
Ergo sicut tunc pius nihil eras amplius,
Tam clementer es misertus nato currens obuius,
Miserere sic dignatus modo mei ocius.