Bernard Boller, Gottschalk d'Orbais de Fulda à Hautvillers

Et quidem nil eo minus uerum multo amplius,
Peccaui tibi proteruus diebus ac noctibus,
At bonum pro nefas tardus, ad malum promptissimus.
Iustificaui misellus meis facinoribus
Peccatores omnes, mundus quos tenet quadrifidus,
Proinde peto prostratus : miserere citius !
O Iesu, quatriduanus, bone pastor, Lazarus
Mortis in sepulchro situs iamque nimis fetidus
Monumento quamuis pressus iamiam scatens uermibus
Ecce, iacet interemptus multis pro criminibus,
Quae gessit econtra stultus segnis hebetissimus,
Priuatus uelut ambobus cum sensu luminibus.
Freme, freme, bone Iesu, ac turbare spiritum,
Lacrimare pio fletu serui pro interitu,
Propria qui semet manu interemit iam diu.
Clama, clama, Iesu Christe, uoce magna, domine :
"Prodi foras, tumulate, ueni foras, Lazare !
Exi, exi, ac procede iam mortis de carcere!"
Si clamaueris me, Christe, redemptor piissime,
Exibo laetus repente ac procedam propere.
Quin uita seruum uocante fugiet mors rapide.
Ligatus manus et pedes faciemque Lazarus
Prodiit ille antiquus uoce dei excitus.
Sic ego plus licet uinctus non prodibo tardius.
Fili dei, Christe, uiui iube tui Lazari
Pedes, manus, ora solui et abire desini
Et uestigiis aduolui sui sacris domini.
IX. annexes
Gottschalk d’Orbais
de Fulda à Hautvillers :
une dissidence
193