Leer en Lewe - AH Bogaards

1. Die Woord moet suiwer verkondig word
Die suiwer verkondiging van die Woord van die Here is onmisbaar en van betekenis
vir die geloofslewe van die lidmate. Daarom het die bedienaars van die Woord so 'n
verantwoordelike taak en sal die siele van hulle hand geëis word. Hulle is uitdelers
van die verborgenhede van God en moet die sleutels van die koninkryk van die
hemele hanteer. Hulle moet volgens die bevel van Christus, aan die gelowiges, aan
almal saam en elkeen afsonderlik, verkondig en openlik betuig dat al hul sondes
waaragtiglik ter wille van die verdienste van Christus hulle deur God vergewe is, so
dikwels as hulle die belofte van die Evangelie met 'n ware geloof aanneem; en
daarteenoor aan al die ongelowiges en aan dié wat hulle nie van harte bekeer nie,
verkondig en betuig dat die toorn van God en die ewige verdoemenis op hulle rus
solank as hulle hul nie bekeer nie (H. Kat. vr. 84).
Met die oog dáárop moet hulle die Skrifte ondersoek sodat hulle ou en nuwe dinge
kan put uit die skat wat God aan sy Kerk gegee het. Daarom is die groot vraag nie of
iemand baie gawes en talente het nie, maar of hy die suiwer goud uit die myn haal
en die water van die lewe uit die fontein put. 'n Preek vol interessante en aktuele
gedagtes is nog nie noodwendig bediening van die Woord nie.
Die Woord moet suiwer bedien word; leervryheid is die dood van 'n gesonde kerklike
lewe. Dit is ook nie net genoeg wanneer bepaal word dat die Woord in 'n Kerk suiwer
bedien mag word nie, nee, die Kerk moet die eis stel dat die Woord suiwer bedien
moet word. As dit gebeur, geld die woord van Christus: Wie na julle luister, luister na
My en wie julle verwerp, verwerp My. Dan sal die Heilige Gees ook die gepredikte
Woord gebruik om die gelowiges te versterk in hulle geloof en die huigelaars te lei
tot bekering, of hulle sal verhard word.
2. Die sakramente moet suiwer bedien word
Ook hier moet dit duidelik gestel word dat ons nie tevrede kan wees net deur te sê
dat die sakramente suiwer bedien mag word nie, nee, hulle moet suiwer bedien
word. Immers, die sakramente is heilige, sigbare waartekens en seëls deur God
ingestel om ons deur die gebruik daarvan die belofte van die Evangelie des te beter
te laat verstaan en te verseël; naamlik dat Hy ons vanweë die enige offerande van
Christus, wat aan die kruis volbring is, vergewing van sondes en die ewige lewe uit
genade skenk (H. Kat. vr. 66). En die Heilige Gees leer ons in die Evangelie en
verseker ons in die sakramente dat ons volkome saligheid gegrond is op die enige
offerande van Christus, wat vir ons aan die kruis geskied het (vr. 67).
3. Die handhawing van die kerklike tug
Gods Woord eis dat die Kerk van die Here die tug moet uitoefen. (Eks. 22:20; Lev.
24:11-16; Matt. 16:18-19; Matt. 18:18; Rom. 16:19; 1 Korinthiërs 5:1 [?? 1 Kor.
5:11; Titus 3:10).
Sonder tug kan die Kerk nie bestaan nie. Tug behoort tot die wese van die Kerk en
nie alleen tot die welwese daarvan nie. 'n Vrugteboom moet gesnoei word sodat die
wilde en dooie takke verwyder kan word en die vrugte meer en beter kan wees.
Hierdie tug dra 'n mediese karakter, dit wil sê, dit dien om die sondaar onder die
seën van die Here te behou en nie om hom te verdrywe nie. Dit gaan om die heil van
die sondaar en van die gemeente. Tug is tot eer van God en gaan oor leer en lewe.
180