Leer en Lewe - AH Bogaards

eerste opstaan, daarna sal ons wat in die lewe oorbly, saam met hulle in wolke
weggevoer word. . .." Dit beteken net dat dié wat in Christus ontslaap het, eers sal
opstaan en dan die ander en daarna word al die gelowiges in heerlikheid opgeneem.
Met ander woorde, dié wat nog in die lewe is as Christus weerkom, sal dié wat
alreeds ontslaap het hoegenaamd nie vóór wees nie (1 Thess. 4:15).
Daar is dus maar net één opstanding. Ons kan dit met die volgende vergelyking
beter verduidelik. Die Bybel praat van die eerste dood wat plaasvind as ons te sterwe
kom en liggaam en siel geskei word. Dan is daar ook die tweede dood (Openb.
20:14) wanneer liggaam en siel in die ewige verdoemenis gewerp word. Die eerste
opstanding is wanneer die siel opstaan uit die dood van sonde; die tweede wanneer
liggaam en siel weer verenig word om die ewige heerlikheid in te gaan.
Die Bybel leer ook nêrens dat daar 'n herstel sal wees van die Ou-Testamentiese
tempeldiens nie. Die diens van die skaduwees is vir altyd verby; toe Christus aan die
kruis gesterwe het, het God die voorhangsel van die tempel in twee geskeur. (Vgl.
Kol. 2: 16, 17; Heb. 10:14; Gal. 5:4; Matt. 5:7; Joh. 14:6; Hand. 2:12 en ook art.
25 van die Ned. Geloofsbelydenis).
Israel is sonder twyfel 'n wondervolk wat altyd geweldig baie invloed uitgeoefen het,
maar ook deur baie gehaat is. Die Sionisme egter is meer van 'n Joods-nasionale as
van 'n godsdienstige karakter. Daarom is die sending onder die Jode van groot
belang en sal dit ook vrugte hê. Maar die Bybel leer nie dat daar 'n grootskaalse
Jode-bekering sal plaasvind nie. Wel word geleer dat baie van hulle tot bekering sal
kom. As die volheid van die heidene ingegaan het, sal ook baie uit Israel bekeer
word sodat die kern behoue bly (Rom. 11:25-26).
In die geval van Openbaring moet ons ook rekening hou met die getalle-simboliek.
Ons kan die getalle nie letterlik opneem nie; getalle soos 3, 4, 7, 12, 144, 666,
1000. In Openb. 20 word ook nie gespreek oor 'n ryk nie maar oor die binding van
Satan en die regering van die gelowiges saam met Christus. Satan is gebind sodat hy
die heidenvolkere as sulks nie meer kan opsweep teen die volk van die Here nie.
Vóór Christus se koms in die vlees het die heidendom op aarde geheers; ná Sy koms
egter is baie volkere gekersten sodat die Christendom in meer as een opsig die
leiding gekry het. Openbaring 20 spreek ook nie van 'n aardse ryk nie, omdat
Johannes die siele sien van diegene wat onthoof is (vs. 4 [Openb. 20:4]). Hulle siele
is verlos; dit is die eerste opstanding (vs. 5 [Openb. 20:5]). Oor hulle het die tweede
dood geen mag nie (vs. 6 [Openb. 20:6]). Satan is dus gebind om die volke as
geheel nie meer te verlei nie (vs. 1- 3 [Openb. 20:1-3]). Die siele van die verlostes
leef om saam met Christus te regeer; dit vang aan met hulle sterwe en dit duur 1000
jaar lank, dit wil sê 10 x 10 x 10 wat die hoogste volheid uitdruk; die héle Nuwe
Testamentiese bedéling. Teen die einde van hierdie tydperk sal die volkere weer
wegsink in volslae heidendom; God sal hulle oorgee aan die mag van die Satan (vs.
7–10 [Openb. 20:7-10]). Dan word Satan losgemaak en kry hy besondere mag op
aarde. Die vroeëre Christenvolkere word teruggebring en sal beswyk (vs. 8, 9
[Openb. 20:8-9]). Die getroue oorblyfsel sal vervolg word, maar dan kom Christus
op die wolke van die hemel. Hy gryp in (vs. 9 [Openb. 20:9]) en sal oordeel oor
lewende en dode. Die duiwel en sy helpers sal gewerp word in die poel van vuur en
swawel.
Die chiliasme is sinnelik van aard en miskén die geestelike agtergronde terwyl dit die
enige soenoffer van Christus loën.
201