Leer en Lewe - AH Bogaards

van die Woord van God. Hoe groot is God se genade nie en hoe behoort ons Hom nie
te dank en te verheerlik nie!
Die sakramente bewerk niks waaroor daar nie in die Woord gespreek word nie. Want
die Heilige Gees leer ons in die Evangelie, en verseker ons deur die sakramente, dat
ons volkome saligheid op die enigste offerande van Christus, wat vir ons aan die
kruis plaasgevind het, berus.
Ons moet ook let op die onderskeid tussen Woord en Sakrament. Ons oor en oog is
die twee poorte waardeur God kom om in ons harte te werk. Die duiwel gebruik ook
hierdie twee poorte – hy moet altyd rekening hou met, en werk deur, die
lewensverbande wat God daargestel het. Hy moet hom hou aan God se
skeppersgawes, maar in plaas van dit te gebruik, misbruik hy dit. So misbruik hy die
poort van ons ore met allerlei verderflike en sedelose boeke, gesprekke, opruiende
nihilistiesetoesprake waardeur die harte van mense al meer verdorwe raak. Hy werk
ook deur ons oë met die goddelose bioskoop, skouburg en pornografie om sodoende
die harte van die mense te besoedel.
Nou werk God egter ook deur middel van Sy skeppingsgawes. Luther het die duiwel
genoem die aap van God. Waar God byvoorbeeld 'n Kerk stig, bou Satan 'n kroeg of
bioskoop. Die Heilige Gees werk ook deur die oog en die oor. Gods Woord word tot
ons oor gerig; die sakramente tot ons oog.
Daar kom by dat die Woord deur die Heilige Gees gebruik word om die geloof in ons
harte te werk. Die Woord wederbaar en vernuwe deur die werking van die Heilige
Gees. Verder word ons geloof ook versterk deur die Woord. Ons moet Gods Woord
daagliks lees en ware Skrifkenners wees. Dan word ons geloof gevoed en versterk.
Die sakramente bewerk nie die geloof nie, maar versterk dit net. Daarom is die
Woord vir sowel gelowiges as ongelowiges, terwyl die sakramente slegs vir die
gelowiges is. Beide moet die Evangelie hoor; die prediking en die werk van sending
en evangelisasie is gerig tot beide gelowiges en ongelowiges. Die sakramente is slegs
vir diegene wat bely dat hulle die beloftes van die Woord aanvaar het. Hieruit volg
dat die Woord onmisbaar is vir ons saligheid, terwyl die sakramente nie onmisbaar is
nie hoewel ons hulle ook nie nodeloos ongebruik mag laat nie.
Die Woord gee dus die analise, die ontleding, en die sakramente die sintese. Die
Woord spreek steeds oor verskillende onderwerpe: oor skepping, sonde, verlossing,
heiligmaking ens. Die sakramente wys egter steeds op een en dieselfde saak, te
wete, op die volkome werk van die Drie-enige God: Vader, Seun en Heilige Gees.
Hulle wys op die volbragte werk van ons Here Jesus Christus. Die eenheid tussen
Woord en Sakrament bestaan egter dáárin dat beide ons geloof wys op die volkome
offerande van ons Here Jesus Christus wat eenmaal aan die kruis plaasgevind het as
op die enigste grond en fondament van ons saligheid.
"Die sakramente werk niks waaroor daar in die Woord nie gespreek word nie.
Daarom mag ons hulle nie van mekaar skei, soos sommige sektes wat die
sakramente verag, en die Roomse wat hulle van die Woord los maak nie. Ook ons
skei hulle egter van mekaar indien ons slegs na die prediking gaan luister of indien
ons net ons kinders laat doop en nagmaal gebruik, maar nie gereeld kerk-toe gaan
om na die prediking te luister nie. Ons moet die sakramente gebruik by en ná die
bediening van die Woord.
C. DIE GETAL SAKRAMENTE
God het twee sakramente ingestel. Onder die Ou Verbond was daar ook net twee:
186