Leer en Lewe - AH Bogaards

eindig, die opstandingsliggaam is sonder bloed, sonder polslag en dan eet en drink
ons nie meer nie. Tans is ons liggaam nog soos 'n horlosie wat opgewen moet word,
maar eenmaal sal dit wees soos 'n elektriese horlosie; dan leef ons in gemeenskap
met Christus en deur Hom met die Drie-enige God.
Almal wat gesterwe het, sal uit die aarde verrys en die siele sal verenig word met die
liggame waarin hulle op aarde geleef het. En hulle wat dan nog lewe, sal almal
verander word, in 'n oomblik, in 'n oogwink – in plaas van 'n natuurlike liggaam
ontvang hulle dan 'n geestelike liggaam (1 Kor. 15:44, 51–54).
Dan sal die boeke geopen word; die boeke van Gods Alwetenheid en van ons gewete
(Dan. 7:10; Dan. 3:16). Dan sal die geskiedenisrolle afgedraai word sodat ons sal
sien en hoor alles wat gebeur het. Niemand sal dit kan ontken nie. Maar Gode sy
dank, dan word ook die boek van die lewe geopen waarin die name van die
uitverkorenes staan. Dan sal ons die onmisbaarheid van Christus sien wat vir ons
sondeskuld betaal het.
Die gedagte aan die oordeel is verskriklik vir die goddelose en vir die Bose. Dan sal
God sy wraak openbaar. Vreeslik sal dit wees om te val in die hande van die lewende
God. Hulle sal veral gestraf word vanweë al die onreg wat hulle die vromes
aangedoen het. Hulle sal gepynig word in die ewige vuur wat berei is vir die duiwel
en sy engele. Die Bybel noem die hel vóór die oordeelsdag die gevangenis, maar na
die oordeelsdag heet dit die poel van vuur en swawel. Die hel is die plek van die
buitenste duisternis waar die wurm nie sterf en die vuur nie uitgeblus word nie.
Die uitverkorenes sal met eer en heerlikheid gekroon word. Alle roem is uitgesluit.
Hulle sal die kroon van die lewe ontvang. Dit sal bekend word dat hulle saak die saak
van God is. Die nuwe Jerusalem sal neerdaal op die herskape nuwe aarde. Die eer en
heerlikheid van die nasies sal daar ingebring word. Dan sal God alleen verheerlik
word. In die verbond van die verlossing, die Vrederaad, het die Vader die
uitverkorenes aan die Seun gegee en die Heilige Gees sal hulle in Christus inlyf.
Nou sal ons die vervulling van die vrederaad sien. Die Heilige Gees sal al die
uitverkorenes saam met die herskape heelal neem en die Kerk as 'n rein bruid
sonder vlek of rimpel aan die Seun gee. Dan gaan die Seun en die Heilige Gees saam
met hierdie nuwe mensheid, wat herskape is vir sy profetiese, priesterlike en
koninklike taak, tot die Vader. En dan sal die Drie-enige God, Vader, Seun en Heilige
Gees, alles en in almal wees!
203