Denzinger (latin) Enchiridion Symbolorum, Denzinger. In lingua ...

116
Saint Léon I le Grand, Ep. 'Quam laudabiliter' ad Turrib.
ep. Astur., 21. Iul. 447
283 (Impietas Priscillianistarum) tenebris se etiam
paganitatis immersit, ut per magicarum artium profana
secreta et mathematicorum, vana mendacia religionis
fidem morumque rationem in potestate daemonum et in
effectu siderum collocarent. Quod si et credi liceat et
doceri, nec virtutibus praemium nec vitiis poena
debebitur omnisque non solum humanarum legum, sed
etiam divinarum constitutionum decreta solventur: quia
neque de bonis neque de malis actibus ullum poterit esse
iudicium, si in utramque partem fatalis necessitas motum
mentis impellit, et quidquid ab hominibus agitur, non est
hominum, sed astrorum. ... Merito Patres nostri ...
instanter egere, ut impius furor ab universa Ecclesia
pelleretur: quando etiam mundi principes ita hanc
sacrilegam amentiam detestati sunt, ut auctorem eius
(scl. Priscillianum) cum plerisque discipulis legum
publicarum ense prosternerent. Videbant enim omnem
coniugiorum copulam solvi simulque divinum ius
humanumque subverti, si huiusmodi hominibus usquam
vivere cum tali professione licuisset. Profuit diu ista
districtio ecclesiasticae lenitati, quae etsi sacerdotali
contenta iudicio, cruentas refugit ultiones, severis tamen
christianorum principum constitutionibus adiuvatur, dum
ad spiritale nonnumquam recurrunt remedium, qui timent
corporale supplicium. ...
284 (c. 1) Primo itaque capitulo demonstratur, quam
impie sentiant de Trinitate divina, qui et Patris et Filii et
Spiritus Sancti unam atque eandem asserunt esse
personas, tamquam idem Deus nunc Pater, nunc Filius,
nunc Spiritus Sanctus nominetur; nec alius sit qui genuit,
alius qui genitus est, alius qui de utroque processit, sed
singularis unitas in tribus quidem vocabulis, sed non in
tribus sit accipienda personis. Quod blasphemiae genus
de Sabellii opinione sumpserunt, cuius discipuli etiam