Actas da - Xunta de Galicia

— 130 —
Modesto Aníbal Rodríguez Neira
1.1. Unha cala na Administración, un dos tres piares da normalización
Parto do suposto de que o coñecemento e o uso do galego polo persoal da
Administración son dous bos referentes da situación do idioma neste ámbito e
de que o primeiro constitúe para o cidadán un sinal da identidade galega.
Este persoal, do que se excluíu o docente e o da seguridade, posúe unha notoria
capacidade nas destrezas orais, especialmente na de entende-lo galego
(media = 3,53 sobre 4) mantendo así a característica xeral do conxunto da poboación
galega. Así mesmo, cómpre destaca-lo aumento da destreza 'falar' a
medida que se descende na escala, tendencia parella ó maior emprego do galego
nas categorías baixas.
Respecto das escritas, cómpre indicar que melloran nas escalas superiores,
como era de esperar, dado o maior contacto coa escrita que require a súa función.
Tamén convén recordar que, coma no total da xuventude galega, estas
habelencias son mellores canto menor é a idade dos entrevistados: media = 2,91
sobre 4 para escribir no persoal menor de 26 anos; 2,01 nos maiores de 55 anos.
Táboa 1. Competencia lingüística do persoal da Administración en Galicia en medias
(1= nada, 4=moito). MSG-92.
COMPETENCIA EN GALEGO
(en medias; mínimo 1, máximo 4)
CATEGORÍA Entend. Falar Ler Escribir N
Altos cargos 4,00 3,75 4,00 3,75 4
Persoal técnico titulación superior 3,58 2,97 3,05 2,31 139
Persoal técnico titulación media 3,54 3,12 2,96 2,41 193
Persoal administrativo 3,56 3,23 2,86 2,37 383
Persoal subalterno 3,48 3,32 2,60 2,15 363
Pers non especializado 3,53 3,30 2,21 1,73 70
MEDIA XERAL 3,53 3,21 2,78 2,27 1152
Non obstante, onde o perfil lingüístico do persoal da Administración se
aparta máis do común en Galicia é no uso laboral. A clara instalación deste persoal
no bilingüismo (65,8%), 15 puntos por riba do da poboación xeral
(50,7%), en boa parte debida ó contacto cun público heteroxéneo, e as fortes
distancias (22,7 puntos) no emprego monolingüe en galego, indican un distanciamento
considerable respecto á lingua do administrado, non sempre beneficioso
se consideramos que a Administración é un dos piares nos que se asenta o
proceso normalizador e un referente, como queda dito, para o cidadán.