Actas da - Xunta de Galicia

Recursos e actividades necesarias para desenvolver
tecnoloxía da fala en galego
Carmen García Mateo
Departamento de Teoría do Sinal e Comunicacións
ETSE Telecomunicación - Campus Universitario- 36200 VIGO
0. Introducción
Dada a tecnoloxía dispoñible na actualidade para o desenvolvemento dun
sistema de diálogo home-máquina é indispensable dispoñer dunha serie de
recursos orais e de texto no(s) idioma(s) de que se trate. Estas bases de datos,
tamén chamadas córpora, presentan unhas características particulares que fan
que en moitos casos non sexa posible reutilizar material xa existente, e fan
necesario embarcarse en procedementos de deseño, captura e etiquetaxe moi
laboriosos e custosos.
A non dispoñibilidade destes recursos é unha das causas do baixo nivel de
desenvolvemento da tecnoloxía da fala en idiomas minoritarios ou minorizados
como pode se-lo idioma galego. Unicamente co concurso da axuda institucional
é posible hoxe en día afrontar este tipo de proxectos.
Non só os recursos lingüísticos son específicos do idioma, tamén todos
aqueles subsistemas que precisen dunha análise morfosintáctica do texto que hai
que procesar dependen en maior ou menor medida da linguaxe, salvo que para a
súa implementación se empregaran algoritmos adestrados a partir de datos.
No diagrama de bloques da Figura 1 móstranse os bloques fundamentais que
hai que desenvolver nun sistema de diálogo. Podemos distinguir tres grandes
módulos:
1. Conversor texto-fala. Debe ser multilocutor e capaz de xerar voz con
distintas entoacións. Asociado a este bloque, está o módulo de xeración
de mensaxes do sistema.
2. Recoñecedor de fala. Debe poder recoñecer fala continua e dispor dun
vocabulario de máis de 50.000 palabras. Os compoñentes dependentes
do idioma son: os modelos acústicos, o lexicón e o modelo de linguaxe.
3. Xestión do diálogo. Debe ser capaz de extrae-los conceptos semánticos
de cada quenda e dirixi-lo diálogo cara ó fin desexado permitindo a
intervención do usuario na toma de decisións.
Cada un destes módulos presenta unha dependencia do idioma de traballo. A
continuación describirémo-lo estado actual de desenvolvemento, segundo o
noso coñecemento, destes sistemas para o idioma galego.
— 151 —