Actas da - Xunta de Galicia

A normalización terminolóxica do léxico do medio en galego. Tres casos prácticos
CORGA obtivéronse un total de 589 ocorrencias en 257 documentos distintos,
ás que aínda hai que engadir 35 ocorrencias máis nas que medio ambiente
aparece ligado ortograficamente (medioambiente), e sobre as que se pode dicir
que estatisticamente é perceptible un maior uso co paso do tempo. O máis fácil
e simple sería pensarmos que se trata dun castelanismo máis fortemente
implantado na lingua, pero, á marxe desa influencia da lingua teito, estoutros
datos que a seguir se relacionan deben facer muda-las nosas sospeitas. Ocorre
que desde instancias oficiais se trata dunha forma plenamente viva,
documentada e empregada: hai unha Consellería de Medio Ambiente, os
grandes concellos galegos dispoñen dunha área de medio ambiente (Área de
Urbanismo e Medio Ambiente do Concello de Lugo, Área de Infraestructuras e
Medio Ambiente do Concello de Vigo, etc.), na Universidade de Vigo hai unha
Oficina de Medio Ambiente coñecida como a OMA, está presente na
denominación oficial de materias universitarias (“Orientación Química do
Medio Ambiente” é unha materia do quinto curso da licenciatura en Química)
ou, por citar só un exemplo máis, hoxe mesmo -22 de novembro- inaugurábase
en Silleda o “VII Congreso do Medio Ambiente do Arco Atlántico”.
Así pois todo indica que a aposta que desde os diccionarios galegos se fixo
por proscribi-la redundancia que supón medio ambiente en absoluto triunfou por
razóns que en parte nos escapan 21 . Supón unha especie de proceso acumulativo
de acepcións, xa de por si moi próximas, validado fortemente polo uso, cunha
abondosa proxección pública (rotulación de organismos, colectores, vehículos
de recolla...) e que presenta a vantaxe de non resultar equívoca como si pode
acontecer con medio e, especialmente, con ambiente (ambas e dúas formas
polisémicas).
Con todo a nosa proposta, acorde coas linguas máis próximas (portugués,
español e catalán) acolle as dúas posibilidades (medio e medio ambiente) e
privilexia a primeira coa esperanza de que se poida chegar a impor (en medios
de comunicación xa se oe en ocasións falar da consellería do Medio), pero sen
caer na exclusión de medio ambiente polas razóns xa comentadas.
3. Residuo/Refugallo
Este par de termos emprégase a miúdo sen moito rigor e confundíndose no
seu uso apropiado, xa que aparentemente non é moi doado distinguir cáles son
os seus referentes conceptuais, de aí que fixese necesario un estudio
terminolóxico máis detallado pola nosa banda.
Vexamos algúns exemplos do seu uso:
21 Quén sabe se como creación relativamente nova e en uso crecente tivo moito que ver na súa
consolidación ó entrar a formar parte do discurso político e mediático.
— 357 —