Actas da - Xunta de Galicia

Anxo M. Lorenzo Suárez
actual da lingua galega (coñecemento, usos, prestixios, actitudes e opinións,
etc.); e a redacción dun documento de avaliación e de reflexión sobre a
situación sociolingüística actual.
Con respecto ó ámbito do ensino en particular, tal como sinalabamos na
introducción, este constituíu un dos sectores preferentes e primordiais para a
consecución da revitalización social do galego tralo franquismo. A constatación
de que se a lingua non se insería nas prácticas educativas desaparecería
irremediablemente era compartida por tódolos axentes sociais e políticos
comprometidos coa recuperación do galego, e como froito desa persistencia os
responsables políticos aprobaron no Parlamento de Galicia a Lei de
normalización lingüística en 1983.
Sobre a situación do galego no ámbito do ensino foron realizados distintos
traballos durante os anos oitenta e principios dos noventa (véxanse, entre outros,
Rubal 1987, 1988; Rodríguez Neira / López 1988; Arza et al. 1990), pero
carecíase dun estudio do ámbito educativo que mostrase, dun xeito sistemático,
os resultados tras case 20 anos de normalización lingüística trala aprobación da
LNL. Por isto, trala realización por parte da Administración autonómica dunha
enquisa sociolingüística a tódolos centros de ensino en 1998 (véxase
Consellería de Educación e Ordenación Universitaria 1998), na cal se
abrangueu o universo total dos centros públicos e privados de Galicia, o noso
obxectivo primordial consistiu en deseñar unha investigación complementaria
que profundase na análise da vitalidade da lingua na escola mediante a
triangulación dos datos e mediante a realización dun estudio de casos de tipos
diferentes de centros, utilizando para iso un abano diverso de indicadores
cuantitativos e cualitativos.
A información recollida permite mostrar un diagnóstico do proceso de
normalización da lingua galega no ámbito escolar a través de diversos temas
específicos: a situación da docencia do galego e en galego, a existencia de
actuacións de planificación lingüística nos centros escolares, o diferente nivel
de intensidade na galeguización das actividades internas e externas, as opinións
sobre a presencia do galego nas transmisións educativas e sobre os puntos fortes
e febles que se perciben no proceso de consolidación actual do galego no medio
escolar.
A nosa investigación no ámbito escolar centrouse, xa que logo, en obter
información relevante e contrastada para conseguirmos tres tipos de obxectivos:
a) a consecución dun diagnóstico rigoroso sobre a situación actual do galego
nos centros de ensino e nas transmisións educativas; b) a análise das tendencias
sociolingüísticas máis relevantes que contextualizan as prácticas lingüísticas
escolares; e c) a análise das ideoloxías e opinións dos sectores que forman a
comunidade escolar ante o proceso de normalización lingüística.
— 546 —