Actas da - Xunta de Galicia

Inauguración da VIII Conferencia Internacional de Linguas Minoritarias
Pero esta declaración de principios non quixera que se interpretase como
inxenuidade; non queremos que este encontro se converta nun lugar de proclamas
mesturadas con lamentos, que con frecuencia non son máis có preludio dun
gran funeral. Desexamos e esperamos que este sexa un foro de análise rigorosa
e realista da situación, e de estudio dos medios non só para defenderse, senón
para avanzar, medios democráticos baseados na razón, no dereito e na capacidade
de xerar ilusión, medios que nos permitan dunha maneira intelixente sortea-los
obstáculos que se interpoñen na normalización das “nosas linguas”, e
que nos permitan percorre-lo camiño da recuperación da dignidade dos nosos
pobos e das nosas culturas. Á par da sociolingüística descritiva dos dramas que
moitas veces acompañan o contacto de linguas, temos que chegar a elaborar
unha sociolingüística terapéutica. A simple descrición dos problemas e as
estatísticas preocupantes fan parecer aínda máis poderosas e irresistibles as
linguas privilexiadas, rebaixando así a capacidade de resistencia dos que falan
linguas minoritarias.
En cambio unha sociolingüística terapéutica pescuda na natureza e na historia
as razóns que avalan a nosa confianza no futuro da biodiversidade lingüística. A
inmensa maioría dos seres humanos precisan o apoio desta nova lingüística
democrática. O diagnóstico é necesario, pero o diagnóstico só é verdadeira
medicina cando leva aparellado o deseño dunha terapia eficaz. Estou
convencido de que moitos de nós estamos aquí para iso.
— 17 —