Actas da - Xunta de Galicia

Mª Carme Pazos Balado
-para evita-lo diferencialismo, xa que permite comproba-las similitudes entre
ámbalas linguas;
-ó mesmo tempo evita as infiltracións innecesarias de léxico por parte do
teito cando as posibilidades de expresión son diferentes;
-se se indican convenientemente os contextos de utilización das formas, pode
servir igualmente para evita-los castelanismos semánticos, máis difíciles de
detectar.
-e, fóra xa do terreo do léxico, mesmo poderían contribuír a evita-las
interferencias fonéticas de incluírse a transcrición, cando menos naqueles casos
nos que a pronuncia da lingua dominante estea substituíndo as realizacións
propias do idioma cuberto.
Ademais, outro dos inconvenientes de vivir baixo un teito lingüístico é que
este impermeabiliza o idioma cuberto fronte a outros idiomas, pechándoo ás
influencias que non sexan as súas. Contra isto tamén reaccionaron na época das
Irmandades da Fala e da Xeración Nós, concedendo grande importancia á
traducción de autores estranxeiros. Era vital abri-las ventás e que entrasen aires
novos.
Aínda hoxe se insiste na importancia das traduccións no proceso de
normalización e, a pesar de que foron aumentando e na actualidade podemos ler
grandes obras traducidas ó galego, queda moito por andar.
Para traducir o ideal é facelo directamente, sen escalas, porque se damos
pasos intermedios corrémo-lo risco de ir deixando información polo camiño.
Para este labor temos polo de agora en galego poucas ferramentas.
Diccionarios bilingües que poñan en contacto o galego con linguas distintas
do castelán só contamos ata o momento con dous: un que nos permite poñer en
relación o galego co inglés e outro co italiano, ámbolos dous publicados
recentemente e nos dous casos cun número aínda pouco extenso de entradas.
Imos tratar de facer un percorrido, que por forza ha ser breve, polas obras
coas que contamos en galego para cubrir estas necesidades, centrándonos nos
bilingües castelán-galego, tratando de ver en qué medida podían cumpri-los
obxectivos antes mencionados.
1. Primeiras obras
No proceso de recuperación do galego séntese desde moi pronto a necesidade
de contar cun criterio unificador para supera-la situación anárquica na que
realizaron os seus traballos os autores do Rexurdimento. En concreto, o que se
considera máis urxente é a elaboración dun diccionario e dunha gramática,
labores que debían ser levados a cabo por unha Academia.
A Academia tardou en responder a esta demanda, pero houbo intentos
particulares de cubrila, o primeiro deles obra de Francisco Javier Rodríguez,
publicada postumamente en 1863. Desde esta data e ata a interrupción motivada
— 588 —