Actas da - Xunta de Galicia

Kateina Vlasáková
checas e españolas tiveron que agardar ata os anos noventa, unha vez
transcorrida a revolución de veludo e a caída do muro de Berlín. Deste xeito, os
primeiros profesores que partiron dun país cunha democracia recente,
comezaron a impartir clases de checo nas universidades de Zaragoza, Alcalá de
Henares e Granada. Esta última é a única universidade española que o segue
ofrecendo de forma continua, xunto coa universidade de Santiago de
Compostela en Galicia.
Con todo o dito é de destacar que o Instituto de Idiomas da Universidade de
Santiago foi pioneiro en introduci-la docencia da lingua checa no territorio
español xa no ano 1988.
A lingua e cultura checa no contexto do Instituto de Idiomas da
Universidade de Santiago de Compostela
O Instituto de Idiomas da Universidade de Santiago de Compostela xa
cumpriu máis de vintecinco anos desde a súa fundación. É un centro de ensino
de diferentes linguas modernas (alemán, árabe, danés, castelán para
estranxeiros, francés, inglés, italiano, ruso, xaponés e checo). As clases de
tódalas linguas, menos castelán, están organizadas en cursos de oitenta horas
por ano académico, todas enfocadas cara ó logro dun dominio destas, tanto na
súa vertente oral coma escrita. Os cursos diríxense, en principio, ós membros da
comunidade universitaria, pero neles poden matricularse igualmente todas
aquelas persoas alleas á universidade que teñan cumpridos os 16 anos e que
teñan interese no coñecemento de novas linguas. Os alumnos aprenden en
cursos reducidos cun máximo de vinte estudiantes por clase, e cunha media en
checo de dez persoas. Nos cursos prímase a utilización e o dominio práctico da
lingua fronte a un coñecemento puramente teórico. As clases desenvólvense coa
incorporación de medios audiovisuais coma é o vídeo ou o laboratorio de
idiomas e as aulas de informática. Á parte de lles proporcionar titorías
individualizadas ós alumnos, o INID abriu o centro de autoaprendizaxe para os
estudiantes de inglés, proximamente francés e checo. Tamén é un dos centros
examinadores dos exames TOEFL e o TSE, dos exames de Goethe institut, e de
Diplomas básico e superior de español como lingua estranxeira (DELE).
O concepto docente de lingua checa. O enfoque pluridisciplinario
¿A que nos referimos cando falamos do ensino dun idioma? Ó defini-lo
concepto docente dunha lingua, deberiamos ter en conta que este non é
soamente un abstracto sistema de regras e conceptos que serven de instrumento
de comunicación nunha comunidade. Podemos dicir que cada idioma representa
un certo enfoque da realidade, da riqueza da mente e, polo tanto, da creatividade
intelectual, artística ou artesá dos seus portadores e dos seus antepasados, unha
manifestación de variados modelos da existencia en circunstancias variadas.
— 630 —