Journal of Italian Translation

102 Journal of Italian Translation
troppo sale fa male,
bsògna magnè s-ciavéid,
ch’ l’è pu s-ciavéid par tè, par mè e’ va bén,
t’é sémpra da sbruntlè-tè,
mo magna cal do óvi, e sta un pó zétt,
che invíci mè stasàira a la ví vdai
un pó ’d televisiòun, u i è Millesogni,
dis ch’u s véinz dis migliéun
s’i t cèma me telefan, sè, ò capéi,
mo tè ’nca s’i ciaméss, tè ta n’arspònd,
ta n’arspònd mai, u m tòcca córr mu mè,
ècco, a i sémm, i ravéa, quèsta che què
la i i è ad tótt i brudétt, la zcòrr t’un módi,
u n s capéss gnént, la pzézza, e st’èlt ancòura,
ch’ l’è piò ghignòus, e ma la zénta, u i pis,
i n capéss mégga gnént, la zénta, e adès,
mo cs’èll ch’i fa? mè a déggh-che,
cs’èll ch’i va a strulghè mai, mo fé dal robi,
ch’i ciapa tènt ’d chi bócch, e tè, salàm,
tótti i an, tè ta n sté bén s’ ta n vé a paghè
l’abonament, ch’i s dà, vè quèll ch’i s dà,
vè che roba, e i va ’vènti, no, no, basta,
a m so zà stóffa, mo va là, che or’èll?
l’è al nóv e mèz? dabón, zà al nóv e mèz?
ció, ta l sé cs’èll ch’a t déggh? a vagh a lèt.