Journal of Italian Translation

86 Journal of Italian Translation
l’è li, vèrda cla macia se sulèr,
alè ad sòtta, ch’ la s slèrga, la è zà què,
ta n’i scap, ta n t sgavàgn,
mo u s’i fa l’òs, pu u i è póch da capè,
pi te chéul e andè sò,
ènch’ quant u n s va piò invéll, ch’u n s pò mai déi,
u t pèr d’ès intraplèd, pu a guardè bén,
in fònd u i è una schèla,
quant vólti u m’è suzèst, e t vé sò ‘d féuga,
dop un pó ta i si dl’èlt, aquè l’è méur,
ènca què, l’‘e tótt méur, stavólta mò,
t sté ’lé, a ócc bas, invíci no, mai zéd,
u i putrébb ès ’na pórta mascarèda,
cmè ‘dès, bsògna stè ‘ténti ènch’ m’un ciaplètt,
m’un scròch i furminènt, ch’i m farébb bén,
mo i n zènd, al cróccli al s’è spaplèdi, spétta,
fam avdài, sta curdléina
u n sarà una marlètta? ció, la s’éirva
dabón, l’è tótt scaléin, a vagh ch’a vòul,
a rógg, a chènt, ch’a so stunèd, pazinzia,
u n sint niseun, e alà u i è un’èlta schèla,
ch’a i so zà pas da què, o no? i póst ormai,
tanimódi l’è chèsi,
i è tótt cumpàgn, 1'è cumè fè e’ zéir dl’óca,
mo me, basta tní bota,
fintènt che li la è sòtta, orca, ò vést bén?
bèla, puzèda alè, cmè una putèna,
u n m’era ‘ncòura capitè, i la à lasa
di muradéur, la fa rinséida, quèsta,
la dòndla, e quasò in zéima cìapès bén,
a scavèlch la finèstra,
‘na sèla, avènti, un’èlta schèla, ad mèrum,
se tinimèn d’utòun, u s va da sgnéur,
pu un’èlta, a n finéss mai, e tè csa vut?
nu scróllti aquè, mòl fràid, u m’a dluvié,
u i amanchéva un chèn, córr, dài, va véa,
va te caséin, che invíci mè a m’arpòuns,
bsògna fè tapa, d’ogni tènt, cumè,
a n’ò méggh’ piò vint’an, ècco, a so pòst,
mè u m basta zéinch minéut,
mo quant’èll ch’a vagh sò? adès a tach,
sémpra acsè, s’a m’aférum, dop pr’un pó,
la testa, un mulinèl, u i sarà pò
da qualche pèrta e’ sótt,
ch’a n gn’apa d’arivé? mo sótt dabón,