Journal of Italian Translation

80 Journal of Italian Translation
forza, quèst l’è e’ luzòun, quèst l’è e’ bufè,
a so sèlt se bancòun, a so pas ‘dlà,
l’era pin ‘d roba, un magazéin, scatléun,
casi, sach, bòci svéiti,
s’a vagh zò mèl s’un pi, ahi, la mi testa!
dò ch’ò batéu? u m vén e’ sangh? sté fèr,
a i so ‘ndè dri, ‘ta bón, l’è e’ tinimèn
d’un’èlta schèla, l’aqua, sòtta, sint
cmè ch’ la gargòia, andéva ad scaranèda,
du scaléin a la vólta,
una porta, a m so ciap ma la manéglia,
la à zdéu, l’è vért, e tótt’ al luci zàisi,
mo l’è e’ Cuméun, la sèla de cunséi,
u n gn’era un’anma,
ò travarsè, a so ‘ndè tl’uféizi tecnich,
da ‘lè tl’archéivi, un’èlta schèla, ad sas,
piò strètta, orca, vè i péndal, l’è l’arlózz,
ch’ pu l’era di madéun lighéd s’na spranga,
e sòtta csa suzédal? e’ pareva
cumè un mèr in burasca, alè che béus,
tri scaléin, un rastèl,
e’ svulaza dla roba, l’è pizéun?
a sera sòtta i cópp, mo dò ch’i sòuna?
aténti a caminé, l’è tótt sturúl,
se t sgar t vé ad sòtta, e u s sint sémpra sunè,
sté budèl, u s’i va cuvéun, e què?
dò ch’a so scap? mo quèst
l’è e’ pèlch dl’órgan ‘d San Ròch, ècco chi ch’ sòuna,
l’è du burdéll, i zuga, éun e’ pacéuga
si tast, purséa, cl’èlt me mèng u m’à vést,
u s’è férum, i tast i à batú ciòch,
ad sòtta ò sintí frézz, ‘na pozza ad zira,
la éva zà cvért i altèr, qualche candàila
la era ancòura zàisa,
sla fiamba ch’ la baléva,
pu u s’è smórt tótt, però alè u m pèr, cla pórta,
u s va se campanéil, a m’i so bótt,
sno che i scaléin, lègn vèc, un scricadézz,
alt, férma, quèst e’ zéd, e’ zóccla ènch’ quést,
gnént, l’è tótt fraid, ta n vaid alasò ch’ sbrènch?
e cagli asi spandléun, óna la déndla,
la casca, plòff, adès a turnè indrí,
pianin, acsè, ‘d curtèl, tachèd me méur,
e quèst? che préima a n 1'éva mégga vést
sté purtunzéin, l’è vért, ‘n’andit, ‘na cambra,