Journal of Italian Translation

94 Journal of Italian Translation
léu dis, mo l’é un tistòun,
dis ch’ l’avnéva da Vrócc, che mè a n’e’ so
’ddò òch’u li téira fura zérti robi,
l’era ’d Belaria, o no?
vitt, ch’ò rasòun? mo mè a séra sichéura,
a m’arcórd, la tu mà
la à lavurè vint’an tla su butàiga,
mo Pèval quant e’ péunta, a l so, l’è tèrd,
émm préssia tótt, saléutmi la tu mà,
che mè a déggh sémpra ch’a vi vní a truvèla,
pu a la armand, a la armand, e’ pasa i dè,
mo préima o dop a véngh,
e quèst l’è Giorgio,
t saré cuntént? ò vést la tu Milena
in divéisa, ció, la fa una fighéura,
la va ’nca se mutòur? la guéida li?
t’é capéi, mè a n guéid gnénca la carióla,
però, la n’era mèstra la tu fióla?
ah, u n’i pieséva da fè scóla, e alòura,
ch’ la farà ènca carira, òz u n gn’è piò
nisun impediment, òz una dòna,
ta n li vaid? al fa tótt, ènca e’ suldè,
la va par lòu, Giorgio, u n gn’è gnént da fè,
saléutmi la Graziella,
e adès aquè
ch’a n mu n zcórda, e’ sèl gròs, e’ zóccar, l’óli,
’na savunètta, ch’u i n’è ormai ’na scaia,
’na bósta ad boratalco,
ècco, l’Idrolitina, ch’a m zcurdéva,
e a ví tó ’nca de mél, ò un pó ’d rampàzna,
che se lat chèld e’ s-ciòi,
e pu avrébb da pasè da la Lucia,
ch’ la sta alazò a l’inféran, spétta, mo
u n’è li, la Lucia, quèlla che là?
ch’a stéva pr’avnì zò da tè, e alòura
cla sutèna t la é fata? no? a l savéva,
tè t prumètt, tè t prumètt, u n gn’è sà stofa?
dabón? ch’ l’è una piò bèla fantaséa,
e alòura u n’i vén gnént?
orca, zà, t’é rasòun, ’na bèlza, bló
o un maròun schéur, andémm insén da Miro,
ènca adès, ta n pò ’dès?
admatéina, Lucia, a s’avdémm ’dmatéina,