Journal of Italian Translation

78 Journal of Italian Translation
d’ilt i era a gambi vérti, tott sbudléd,
u i avnéva da tòs, i s’afughéva,
un burdèl u m guardéva
d’impí te curidéur, i réid sa mè,
u m ziréva la testa, tropa boba,
avdéva imbarbaièd, o ‘lzè una mèna:
sté zétt, éun l’à rugéu: «Silenzio in sala!»,
un èlt: «Hai la parola», cs’ài capéi?
«Discorso! », mo i è mat ? «Quattr’occhi, dài ».
ch’a n m’aréisgh, pu csa i dégghi? «Capo, alòura?»,
va bén, sté zétt: «Aquè, burdéll, chi ch’ pò »,
a n’éva e’ spéud, «Quèst l’è un zavài ch’ l’è mèi
tó sò e ‘ndè chèsa», u s’è sintú sgrigné,
«La n’è da réid, a n mu n cridéi? guardé
mo guardém, aquasò, mu mè, a n m’avdéi?»,
da un pèlch i m’à ‘rspòst: Quadro!», la è stè fata,
pézz ch’ nè préima, i era ormai tótt runchèd,
dal fazi lóstri, e alè cs’èll ch’e’ sbarbòtla?
cmè ch’ la buléss, pu la à dè sò, mo un zèt,
l’era la beusa, sòtta u s’era impéi,
u la arbutéva fura,
e pu la à ròtt, u n s’è capéi, l’è stè
cmè quante mi muléin i éirva e’ butàz,
la andéva zò, mo una fiumèna, rógg,
u n s’avdéva piò gnént,
un nibiòun, a vampèdi, da srè i ócc,
la m piuvéva madòs, e ad sòtta l’era
la fèin de mònd, 1’aqúa, u sintéva sbat
ti méur, u m’arivéva i squézz tla faza,
ò vést ‘na córda, a l’ò ingranfèda, sò,
a m so tróv spèsa al quéinti,
u i era un’asa, cmè un caminamént,
avènti pò, fina una pórta ad fèr,
ò vért, un curidéur se tapàid ròss,
mo quést l’è i pèlch, ò vést scrétt «II Ordine»,
sò pr’al schèli, «III Ordine», un mumént,
che pèlch sla pórta vérta, fam avdài,
a so éintar, ò guèrs ad sòtta, mama,
zénta, pultròuni, gnént, l’era tótt’aqua
sòura u i baléva plézzi, guènt, capéll,
e la crèss sémpra, i préim pèlch i è zà a bagn,
l’è sòtta ènca i sgónd pèlch, èlt che guardè,
aquè bsògna ‘ndè sò,