Descarga en formato PDF (3,8 MB) - Centro Ramón Piñeiro para a ...

Psicolingüística e neurolingüística
7 Psicolingüística e neurolingüística
666. Pérez Pereira, Miguel: “Efectos do bilingüismo na adquisición da linguaxe dos nenos
pequenos: un estudio con nenos galegos”, en Anxo M. Lorenzo Suárez, Fernando Ramallo e
Xoán Paulo Rodríguez Yáñez (eds.), Bilingual Socialization and Bilingual Language Acquisition
= Socialización bilingüe e Adquisición lingüística bilingüe: Proceedings from the Second
International Symposium on Bilingualism = Actas do Segundo Simposio Internacional sobre o
Bilingüismo (University of Vigo, Galicia-Spain, October 23-26, 2002), [Ed. dix.]: [Vigo], Universidade
de Vigo, Servizo de Publicacións, 2004:305-318 [CD-ROM]. | [Ed. facs. en liña n.v.]:
Vigo, Universidade de Vigo, Seminario de Sociolingüística e Bilingüismo, [2005], , [Formato: PDF],
[Consulta: 01/03/2006].
1. investigación | 2. ámb. galego | 3. sincrónico | 4. c | 5. lingua oral
O autor comeza por amosar o controvertido que segue a ser o tema dos efectos do bilingüismo sobre o
desenvolvemento da linguaxe a través dun repaso da bibliografía pertinente. Logo presenta os resultados
dunha avaliación da capacidade de comprensión e produción do vocabulario, así como do coñecemento
morfolóxico e sintáctico dos nenos e mesmo do uso de formas de comunicación prelingüística
polos máis pequenos. A mostra utilizada estaba constituída por 706 nenos e nenas galegos, dos que
431 (61%) vivían nun medio familiar bilingüe castelán-galego e 275 (39%) nun medio monolingüe
galego. A proba empregada para avaliar o nivel de desenvolvemento comunicativo e lingüístico foi
a versión galega da escala MacArthur ou Inventario para o Desenvolvemento de Habilidades Comunicativas,
que “presenta moi bós valores de validez, fiabilidade e consistencia interna” (p. 309) e cuxo
contido se describe detalladamente. A partir dos datos recollidos, fíxose unha análise comparativa
das medias obtidas polo grupo de nenos bilingües e monolingües e cada un dos principais apartados
das dúas formas da escala MacArthur (Palabras e xestos, destinada a nenos de entre 8-15 meses, e
Palabras e oracións, destinada a nenos de entre 16-30 meses). Os resultados dos nenos bilingües nos
diferentes apartados do inventario Palabras e xestos son mellores que os dos monolingües, malia que
as diferenzas non cheguen a ser estatisticamente significativas. Polo que atinxe ao inventario Palabras
e oracións, os nenos bilingües sempre acadan mellores resultados que os monolingües e as diferenzas
en apartados como “uso/entendemento da linguaxe” ou “Complexidade das frases” chegan a ser estatisticamente
significativas.
Vid. tamén a entrada 22.
316 Bibliografía analítica da lingua galega (2004)