Maart 2013: jaargang 10, nommer 1 - LitNet

4.1 Ouderdomsgroep
LitNet Akademies Jaargang 10 (1), Maart 2013
In die steekproef wat ondersoek is, het dit geblyk dat meer jong mense oorweeg het om die
land te verlaat.In die ouderdomsgroep van 18 tot 24 het 30% van die respondente aangedui
dat hulle emigrasie oorweeg het. Die laagste waarskynlikheid om te emigreer is in die groep
van 55 tot 64 jaar aangedui.
4.2 Geslag
Die studie het aangedui dat mans ’n hoër geneigdheid as vrouens het om te emigreer.
Veertien persent van vroue het aangedui dat hulle definitief sou emigreer of dit ernstig
oorweeg, in vergelyking met 21% van die mans. Die motivering vir die verskil tussen
geslagte lê in die feit dat mans aangedui het dat beter werksgeleenthede die groot oorweging
sou wees, terwyl vroue aangevoer het dat misdaad en geweld die hoofoorweging sou wees.
4.3 Voorkeurbestemming
Die meeste deelnemers (25%) het aangedui dat hulle voorkeurbestemming Brittanje (VK) sou
wees, terwyl 23% sou verkies om na Australië en 20% na die VSA onderskeidelik te
emigreer. Die jonger deelnemers het Brittanje (VK) as voorkeurbestemming aangedui, terwyl
die ouer deelnemers Australië verkies het.
4.4 Groepsdruk
Die genoemde studie het aangetoon dat selfs mense wat nie emigrasie oorweeg nie, graag
daaroor gesprek voer, en ’n kwart van die Suid-Afrikaners wat aan die studie deelgeneem het,
is deur vriende of familie aangemoedig om te emigreer. Van die mense wat kinders op skool
of universiteit het, het 23% van die deelnemers hulle kinders aangemoedig om blyplek in ’n
ander land te vind.
4.5 Redes vir vertrek
As die motiverings vir emigrasie ondersoek word, is die primêre oorweging wat gerapporteer
is, geweld, misdaad en korrupsie (82%), teenoor die ooreenstemmende syfer (55%) van 2008.
Ander oorwegings wat geïdentifiseer is, is ’n onstabiele ekonomie (31%), regeringsprobleme
(31%), diskriminasie (7%) en bekommernisse oor infrastruktuur (3%).
4.6 Redes om te bly
’n Aantal redes wat hulle sou weerhou van emigrasie word deur die deelnemers in die studie
aangevoer. Die grootste rede was “die wonderlike klimaat” (28%), gevolg deur “om naby
familie en vriende te wees” (23%). Vir 22% is die primêre rede hulle “liefde vir Suid-Afrika
se mense”, terwyl 19% “die natuur” en “wild” aangedui het. Vryheid en diversiteit van
kulture in Suid-Afrika is ook as redes aangegee.
555