O le a le Feagaiga Fou?

O le Tusi a le Aposetolo o Paulo i Kalatia
Ia fesili atu i tagata o le vasega pe aisea o le a le mafai ai e le ituaiga
o aoga e pei ona faamatalaina ona saunia i latou mo la latou
galuega ua filifilia. Sa faaiuina le saunoaga a Elder Packer e faapea:
“E le faapena ona fai. E le o le auala lena e faia ai -
e le faia faapena ia aoga, e le faia foi faapena i le
faaleagaga. O loo i ai sauniga taua e pei foi ona i ai
o vasega manaomia. O loo i ai tulaga faatonuina ua
uma ona fuafua mo le agavaa. Afai tatou te teena ia
tulaga, alo ese mai ai, pe le faia foi, o le a le mafai
ona tatou ulu atu faatasi ma i latou o e na faamaeaina
aoaoga” (Liahona, Ianuari 1986, 64).
Ia tautino atu i tagata o lau vasega ua na o le tasi lava le
talalelei moni i luga o le fogaeleele o loo i ai aoaoga uma,
sauniga, ma feagaiga tatou te manaomia e toe fo’i atu ai i le
Tama Faalelagi ma ola e pei o Ia i Lona malo. Ia ta’u atu
i tagata o le vasega sa malamalama le Aposetolo o Paulo
i lenei mataupu faavae ma sa taumafai o ia e faamatala atu
i le Au Paia (tagai Efeso 4:5, 13).
Ia faitau ma talanoaina mau o loo i lalo atoa ma fesili
e faatatau i ai faatasi ma tamaiti. Atonu latou te mananao
e vase lalo o tali i nei mau.
Kalatia 1:6–9 Pe fia ea talalelei moni o loo i ai? Pe aisea e
avea ai le aoao atu o fuafuaga eseese o le talalelei
ma faafitauli matuia i le faatuatua o se tasi?
Kalatia 1:10 Pe aisea ua avea ai aoaoga a tagata ma mea e
masani ona malie i nisi nai lo aoaoga a le Faaola?
Kalatia 1:11–12 Sa aoaoina e Paulo le tele o mea e uiga i le
Talalelei mai tusitusiga paia faapea fo’i ma le
taimi na aoaoina ai o ia i mea tau lotu i le taimi
a’o avea o ia ma se tamaitiiti, ma e le masalomia
le talanoa atu i tagata o le Ekalesia ina ua mavae
lona liliu. O le a le pogai ua e manatu ai sa
faapea mai Paulo na aoaoina o ia i le talalelei
“e ala i le faaali mai o Iesu Keriso”? (tagai
Galuega 9:4– 6). E taua faapefea faaliga i le
aooaina o le talalelei?
Ia faamatala atu o Paulo o se tagata fou ua liliu mai i le
talalelei o le na aoaoina le talalelei ma le mautinoa atoa ma le
mana. Sa manao o ia ia iloa e taitai pulefaamalumalu o le
mataupu faavae sa ia aoao atu e mautu ma e faaautu ia Iesu
Keriso. Faitau le Kalatia 2:1–2, 9 ma fesili:
• O ai na lauga atu i ai Paulo i Ierusalema? (Afai ua tatau ai,
ia faitau mai e tagata o le vasega le Ioane 1:40–42 ina ia iloa
ai o Kefa o Peteru lava lea.)
• Pe na faapefea ona tali atu Peteru, Iakopo, ma Ioane
i aoaoga a Paulo?
• Pe aisea ua taua ai lo latou aoaoina o le talalelei e tasi?
Faitau le Mataupu Faavae ma Feagaiga 1:30. Ia fai atu i tagata
o le vasega e faamatala mai le lagona o loo ia i latou ina ua
200
iloa ua toefuata’i mai e le Faaola, e ala i faaaliga i perofeta ma
aposetolo, le Ekalesia moni e tasi na i ai i le lalolagi i le
vaitaimi o Paulo.
Kalatia 2:9–14. O le lotogatasi o Aposetolo ua
maua ai se faataitaiga o le malosiaga mo tagata
o le Ekalesia. (15-20 minute)
Ia saunia ni penitala fou se sefulu ma le tolu, po o ni fasi laau
e faapena le lapopoa, faapea fo’i ma ni nai pa’u meme’i. Ia fai
atu i se tasi e ofo mai e sau e gau lua se penitala (po o se fasi
laau). Ia fusi faatasi penitala o loo totoe i le pa’u ma ia valaau
atu i se tasi e sau e taumafai e gagau lea fusi penitala. Fesili atu:
• Pe aisea ua faigata ai ona gagau ia penitala pe afai e tuufaatasi?
(Ia mautinoa ua malamalama i latou o le malosi o le
penitala e tasi e faaopoopoina pe a tuufaatasi penitala e tele.)
• Faitau le Kalatia 2:9. Pe aisea na taua ai le maua e Paulo
ma Panapa o le “lima taumatau o le faatasiga” (o le talia
ma lagolagoina) o Peteru, Iakopo, ma Ioane?
• Pe faapefea ona avea le lotogatasi o ta’ita’i o le Ekalesia ma
mea e manuia ai le galuega o le aoao atu ma le taita’ia
o le talalelei?
Ia faamatala atu ina ua alu atu Peteru i Anetioka, sa aai faatasi
ma Nuuese. Sa suia lena lagona ina ua taunuu mai se vaega
o le Au Paia Iutaia, o e na manatu e le tatau ona faifai mea
faatasi ma Nuuese, faatasi ma le Aposetolo o Iakopo (tagai
Kalatia 2:11–12). Faitau le Kalatia 2:13–14 ma fesili atu:
• O ai na mulimuli i le faataitaiga a Peteru ina ua tu’ua e ia
e na liliu o nuuese ma alu atu e aai faatasi ma tagata o le
Ekalesia Iutaia?
• O le a se tali atu a Paulo e tusa ma lea mea na fai e Peteru?
• Aisea na taua ai le i ai o se talitonuga e tasi ia Peteru ma
Paulo e uiga i lenei mea?
• Pe faapefea ona vaivai le Ekalesia pe afai e feeseesea’i taitai
e uiga i le mataupu o Keriso?
Ia faamatala atu le saunoaga a Bruce R.McConkie e uiga
i lenei eseesega:
“Sa manao Peteru e faamalie le tulaga ua oo i ai ona
o lona fefe ne’i fa’amanuaina e ia loto o tagata Iutaia
o e e le’i matua liliu moni ma sa pipii pea i le tulafono
a Mose. . . .o le mea mautinoa lava, ana fai ua tatou
maua le faamatalaga atoatoa, semanu ua tatou maua
se faamatalaga e uiga i le toe liliu o Peteru ma faia
mea uma i lona mana po o lona malosi i le uunaia
o le Au Paia Iutaia ina ia talitonu o le tulafono a Mose
ua faataunuuina ia Keriso ma ua le toe aoga i se isi
po o se Iutaia po o se nuuese” (Doctrinal New
Testament Commentary 2:463-64).