O le a le Feagaiga Fou?

FAATOMUAGA I LE TUSI LESONA A LE FAIAOGA FEAGAIGA FOU
“O le faamoemoega o aoaoga faalelotu i le Ofisa o Aoga a le
Ekalesia, o le fesoasoani lea i tagata taitoatasi, o le aiga, ma
taitai o le perisitua ina ia faataunuuina le misiona a le Ekalesia”
(Aoaoina Atu o le Talalelei: O Se Tusitaulima a Faiaoga ma Taitai o
le OAE [1994], 3). O le vaega muamua lava e faamamafa ina ia
ausia lenei faamoemoega, o le aoao lea o tamaiti o le vasega i le
talalelei a Iesu Keriso, e pei ona maua i tusitusiga faavae ma
afioga tulei a perofeta. Ua saunia lenei tusi lesona e fesoasoani
ai ia te oe ina ia ausia lena tulaga—po o le a lava lou tomai
faafaiaoga ma pe o le a foi le gagana o loo e aoao atu ai.
O le vaega lona lua e faamamafa o le aoao atu lea i mataupu,
o faataitaiga, ma le mana o le Agaga. O i latou e aoao atu i
mataupu ma faataitaiga, e sili atu ona lelei lo latou aoaoina atu
o le talalelei. O le aoao atu i mataupu, e tatau ona e sailia
muamua, “e ala i le suesue ma le faatuatua” (MFF 88:118), ina
ia malamalama ai i mataupu faavae o le talalelei a Iesu Keriso.
Ina ia aoao atu e ala i faataitaiga e tatau ona e ola i le talalelei i
lou lava olaga. Ma e tatau ona e faalagolago i le Agaga mo le
taitaiga. Na aoao mai Elder Boyd K. Packer, o se sui o le
Korama a Aposetolo e Toasefululua: “E oo mai le mana pe a
uma ona ia faia mea uma na te mafaia ina ia saunia ai, ae le na
o le lesona lava ia, ae ia ogatasi lona olaga ma le Agaga. Afai o
le a ia aoao e faalagolago i le Agaga mo musumusuga, e mafai
ona ia tulai atu i luma o lana vasega . . . ua matua’i mautu i le
iloaina lea e mafai ona ia aoao atu i musumusuga” (Teach Ye
Diligently [1975], 306). O le mana lea e saunoa i ai Elder Packer
e masani ona faaalia atu a o tuuina atu e se faiaoga lana lava
molimau i le mataupu po o le aoaoga faavae sa aoaoina atu.
O le Auala e Faaaogaina ai Lenei Tusi Lesona
O tusitusiga paia e ao lava ona avea ma au puna’oa silisili
a o e sauniaina au lesona. Ina ia fesoasoani ia te oe i lau
suesueina o tusitusiga paia ma le sauniaina o au lesona,
e tatau ona ia te oe ia tusi lesona nei:
• O le tusi lesona lenei—Tusi Lesona a le Faiaoga Feagaiga Fou
(numera 34590.890)
• O le tusi lesona a le tamaitiiti o le vasega o le seminare
e suesue lava ia i le fale—Taiala Suesue a le Tamaitiiti o le
vasega o le Feagaiga Fou (numera 34188)
• O mea e lagolagoina ai ia le faasologa o vitio o le Feagaiga
Fou—Vitio Taiala o le Fegaiga Fou (nu. 34232)
O nei tusi lesona e le suia ai lau suesueina o tusitusiga paia,
pe suitulaga foi i taitaiga musuia a le Agaga Paia a o sauni
e aoaoina au tamaiti o le vasega. Ua na o risosi ma ni
fesoasoaniga faaopoopo mo le sauniuniga o au lesona.
Aemaise lava, o le Tusi Lesona a le Faiaoga o le Feagaiga Fou o loo
tuuina atu ai faamatalaga tomua e faatatau i poloka o mau,
otooto atu ai ia mataupu faavae taua o le talalelei e vaavaai
i ai, ma fautua atu ai auala e mafai ona aoaoina atu ai le tele
o na mataupu faavae ina ia fesoasoani ai i tamaiti o le vasega
ia malamalama i ai ma faaaogaina i o latou olaga.
1
“Ua mautu le faamoemoe o taitai o le OAE i lana faatulagaga
o aso taitasi, o loo tele ai taimi avanoa mo aoaoga, e tatau ona
aoaoina tusitusiga paia i se faasologa e talafeagai ai lona sao.
O se tasi o auala sili e aoao atu ai le talalelei a Iesu Keriso o le
aoao lea o tusitusiga paia i se faasologa sa’o. O le faasologa
talafeai o le aoaoina o tusitusiga paia o le aoao atu lea ile faasologa
o loo faaalia mai i tusitusiga paia” (Aoaoina o le Talalelei, 22;
tagai i le itulau lena mo nisi faamatalaga i le faasologa o le
aoaoina atu o tusitusiga paia). O lenei tusi lesona e mulimuli
i le faasologa o tusitusiga paia ae le o tuuina atu ai ni
fesoasoaniga mo aoaoga mo fuaiupu uma o loo i le poloka
o mau. O fesoasoaniga faaopoopo o loo maua i le tusi lesona
a tamaiti o le vasega o aoaoga faalelotu ma le taiala suesue
a tamaiti o le seminare.
O le Aoaoina Atu o le Talalelei: O le Tusitaulima mo Faiaoga ma
Taitai o le Ofisa o Aoga a le Ekalesia (nu. 34829.890) o loo tuuina
mai ai ni fesoasoaniga auiliili i le aoaoina o se vasega a le
OAE. E tatau ona e matuai masani lava i ona vaega.
O fautuaga faalauaitele nei e mafai ona fesoasoani tele
i le saunia o lau lesona.
Saunia Lou Tagata Ina ia Suesueina ma
Aoaoina Atu le Talalelei
• Ola i le talalelei.
• Tatalo mo le Agaga ina ia taitaiina oe a o e suesue,
a o e sauniuni, ma a o e aoao atu.
• Faatinoina le faatuatua i le Alii, i le mana o le Agaga, ma le
mana o tusitusiga paia ina ia faafetaiaia ai manaoga o au
tamaiti o le vasega.
Fuafua Po o le a le Mea o le a e Aoao Atu
• Fuafua po o le a le vaega o tusitusiga paia e te manao e aofia
i lau lesona. O lenei tusi lesona ua vaevaeina i ni poloka
o mau lea o loo faailoa mai ai le tala po o le suiga o le
mataupu. O le saoasaoa taiala o loo i le itulau 5–6 e mafai
ona fesoasoani ia te oe e fuafua po o le a le tele o mea
e faaaogaina e aofia ai i aso taitasi o le vaiaso.
• Suesue mae’ae’a le poloka o mau. Faitau soo i ai, ma faailoga
ia aoaoga faavae, mataupu faavae, mea na tutupu, ma upu
po o fuaitau faigata. O le tusi lesona lenei, o le tusi lesona
a le tamaitiiti o le vasega o aoaoga faalelotu, ma le taiala
suesue a le tamaitiiti o le vasega o le a fesoasoani lea ia te
oe ina ia malamalama ai i le poloka o mau ma fuafua ai po
o le a le mea e taua i au tamaiti o le vasega. Ole a lelei lau
aoao atu pe afai na e mauaina se vaega musuia i le poloka
o mau. Atonu o le a e taitaia foi au tamaiti o le vasega ina
ia faia foi lea lava sailiiliga.
• Filifili aoaoga faavae, mataupu faavae, ma mea na e sili atu
ona taua mo au tamaiti o le vasega ina ia iloa. Ia tuu atu i
uunaiga a le Agaga ma manaoga o lau vasega e taitaiina ai
oe a o e fuafuaina po o le a le mea e aoao atu.