O le a le Feagaiga Fou?

O le Talalelei e Tusa ma le Faamatalaga a Luka
Faatomuaga
Na molimau mai ia Elder Hans B. Ringger o le Au Fitugafulu:
“O le faavae ma le moli taiala mo a tatou faaiuga uma o le
talalelei lea a Iesu Keriso ma Lana savali i le lalolagi. O aoaoga
a Keriso e tatau ona tofatuina i o tatou manao ina ia filifili le
sa’o ma ia tatou moomoo e sailia le fiafia. O Lona soifuaga
amiotonu e tatau ona atagia i a tatou mea e fai” (i le Conference
Report, Ape. 1990, 31; po o le Liahona, Iulai 1990, 25).
I le Luka 10–13 na aoao atu ai le Alii i tagata faapea e tatau
ona atagia atu i o latou olaga le amiotonu. Na Ia fesoasoani ia
i latou ina ia latou iloa le taua tele o le mama o o latou loto, ia
mama o latou mafaufauga, ma ia faamaoni le latou auaunaga.
Na aoteleina e le Alii lenei aoaoga i nei upu ua lauiloa: “e te
alofa atu i le Alii lou Atua ma lou loto atoa, ma lou agaga
atoa, ma lou malosi atoa, ma lou manatu atoa; e te alofa atu
foi i le lua te tuaoi ia pei o oe lava ia te oe” (Luka 10:27).
Ia suesue ma le agaga tatalo le Luka 10–13 ma mafaufau
i mataupu faavae nei ae le’i sauniaina au lesona.
O Nisi Mataupu
Faavae Taua o le Talalelei e Saili Iai
• Afai tatou te teenaina ia le savali o le talalelei po o auauna
a le Alii, o le a fesiligia i tatou i le faamasinoga a le Atua
(tagai Luka 10:8–16; tagai foi MFF 84:74).
• A o faateleina o tatou faamanuiaga, e tatau foi ona faateleina
lo tatou amiotonu. O lo tatou faasalaga o le a faateleina pe
a tatou liliuese mai le Atua ina ua uma ona mauaina Ana
faamanuiaga (tagai Luka 12:15–21, 42–48; tagai foi MFF
82:3–10).
• Ua poloaiina i tatou ina ia tatou alolofa ma auauna atu i isi
ua matitiva, e tusa lava po o le a lo latou lanu, faatuatuaga,
ituaiga, po o le vaega e i ai (tagai Luka 10:25–37).
• E tatau ona tatou faaaoga lelei ia avanoa taua faaleagaga ae
aua ne’i faalavelavea i mea e le taua (tagai Luka 10:38–42;
tagai foi MFF 66:10).
• Na silafia e Iesu Keriso manatu ma gaoioiga lilo a tagata
uma, na Ia fetuuina le pepelo (tagai Luka 11:37–54;
12:54–57; 13:14–16; tagai foi 2 Nifae 26:29–31).
• O le amiotonu e fuatiaina i o tatou faanaunauga ma mea
e fai, ae le o le tofiga po o le tulaga i le Ekalesia (tagai Luka
10:25–37; 11:28, 42–48).
Fautuaga mo le Aoao Atu
Filifili mai se manatu nei, pe faaaoga ni ou lava manatu,
a o e sauniaina lesona mo le Luka 10– 13.
Luka 10:1–37 (tagai foi Mataio 11:20–26).
E tatau ona tatou alolofa ma auauna atu ia
i latou o e matitiva. (40–45 minute)
Ia faia se tasi o mea nei ina ia faatulagaina ai se talanoaga
o avanoa i aso taitasi e auauna atu ai i isi:
90
• Fai atu i tamaiti o le vasega e faamatala mai se taimi
mulimuli na latou iloaina ai se tasi o loo manaomia le
fesoasoani ma le mea na latou faia e fesoasoani atu i ai.
• Ia valaaulia tamaiti o le vasega e fetufaai atu pe na
faapefea ona auauna atu isi ia i latou talu ai nei lava.
• Ia faatupuina se tulaga e tuuina atu ai i tamaiti o le vasega le
avanoa e auauna atu ai i se tasi. Ia maitauina le mea e tupu,
ma talanoaina o se vasega ia taunuuga. (Mo se faataitaiga,
tuu atu i se tamaitiiti o le vasega e faatoulu ana api ma ana
pepa i luga o le palapala ma taumafai e piki i luga.)
Fesili atu:
• E faafia ona e vaai i se tagata o loo manaomia se fesoasoani?
• O le a sou lagona pe a e vaai i se tasi o loo moomia le
fesoasoani?
• E faapefea ona e mafaufau po o le a le taimi e te fesoasoani
atu ai i isi?
Ia valaaulia tamaiti o le vasega e fetufaai atu se faataitaiga
o se taimi na alu atu ai se tasi e fesoasoani ia i latou. Fesili atu:
O le a se lagona na oo ia te oe i lenei mea?
Tuu atu i tamaiti o le vasega e faitau le Luka 10:1–9 e vaai i ai
i le auaunaga na tuuina atu e le au fitugafulu. Fesili atu:
• Aisea e avea ai le galuega faatalai ma se auaunaga taua?
• Faitau ia fuaiupu 17–20. E tusa ai ma nei fuaiupu,
o a faamanuiaga na maua e le au fitugafulu ona o se
taunuuga o le latou auaunaga?
• Faitau fuaiupu 25–27. O le fea o poloaiga sili e lua
e faatatau i le auaunaga?
• Faitau le fuaiupu e 28. O a lagona e oo mai ia i latou
o e auauna atu?
• Aisea e te manatu ai o le auauna atu o se mataupu faavae
taua lea o le talalelei?
Na faailoa mai e le Faaola po o ai e tatau ona tatou auauna atu
i ai ina ua Ia tuuina mai le faataoto i le Samaria agalelei. Faitau
le Luka 10:30–33, ona fetufaai atu lea o manatu nei mai ia
Peresitene N. Eldon Tanner, o le sa avea ma sui o le Au
Peresitene Sili:
“Se’i o tatou iloilo totoa lava le uiga o lenei tala.
“Muamua, sa maua e le Samaria le ‘alofa.’ Sa ia maua
se uunaiga mai lona loto ina ia fesoasoani atu, aua foi
sa nutimomoia lona loto ona o le tagata manua ma
lona puapuagatia. O lenei lagona alofa e aumaia i loto
o soo se tagata ua ootia i le Agaga o le Alii. O nei
lagona alofa e tatau ona tatou lagonaina taitoatasi mo
isi tagata. O le mea moni sa fetalai le Faaola o le
a iloa Isaraelu osi feagaiga i le faaali atu lea o le alofa
o le tasi i le isi. (tagai Ioane 13:35.)“