Aðgerðasjúklingar liggja ekki aðgerðalausir II - Hirsla - Landspítali

12
Jafnframt um líkamsímynd og breytingu á henni samfara brottnáms á brjósti. Þá er
greint frá niðurstöðum rýnihóps hjúkrunarfræðinga og sjúkraliða á lýtalækningadeild
Landspítala á því hvernig styðja mætti við jákvæða líkamsímynd kvenna sem gangast
undir brjóstauppbyggingu. Höfundur lýkur kaflanum á að segja að hlutverk
hjúkrunarfræðinga sem annast konur eftir brjóstauppbyggingu ætti að vera að efla
sjálfstraust og sjálfsvirðingu kvennanna ásamt því að veita fullnægjandi fræðslu. Þá megi
ekki gleyma því að konan hafi að auki gengist undir stranga meðferð vegna
krabbameinsins. Síðari kaflinn í þessum flokki tengist jafnframt lokaefninu sem er
útskrift og eftirfylgd af sjúkrahúsi en tveir síðustu kaflarnir fjalla um það auk kafla þeirra
Heiðu Hringsdóttur og Sólveigar Tryggvadóttur um Útskriftaráætlun eftir skurðaðgerð vegna
brjóstakrabbameins. Í kaflanum fjalla þær um brjóstakrabbamein og það að greinast með
krabbamein. Þá greina þær hvernig skuli staðið að útskrift kvenna með meinið og tengja
þær umfjöllun sína við ferlið á Sjúkrahúsinu á Akureyri. Þær kynna áætlun sem þær
þróuðu í tengslum við verkefnið og skiptist sú áætlun í þrjú þrep: 1) Mat á kvíða, reynslu
og þekkingu; 2) Fræðslu og kennslu og 3) Eftirmeðferð. Höfundar ljúka umfjöllun sinni
á að segja að í upphafi skyldi endinn skoða og eru þar að vísa til mikilvægis þess að
markviss útskriftaráætlun skuli hefjast við innlögn sjúklinga á sjúkradeild. Kristjana
Guðrún Halldórsdóttir starfa einnig á skurðdeild Sjúkrahússins á Akureyri og þróaði líkt
og Heiða og Sólveig útskriftaráætlun til notkun á þeirri deild. Kafli Kristjönu heitir
Útskrift sjúklinga eftir mjaðmabrot. Með gerð útskriftaráætlana er vonast til að fækka megi
legudögum og ótímabærum innlögnum á sjúkrahús og að auka megi tengsl sjúkrahúsa
við þá sem veita þjónustu eftir útskrift. Áhrif góðrar útskriftar geta verið margþætt fyrir
sjúklinginn og samfélagið. Í kaflanum er fjallað almennt um gildi útskriftaráætlana auk
þess að lögð er fram áætlun um útskrift sjúklinga eftir mjaðmabrot. Niðurstaða
höfundar er að útskriftarviðtal og góð áætlun við útskrift auki ánægju og bæti öryggi
sjúklinga sem hafa mjaðmarbrotnað.
Í lokakafla bókarinnar er fléttað saman tveim þáttum sem hjúkrunarfræðingar
sinna mikið en það er útskriftin, líkt og í köflunum tveimur á undan, og svo fræðsla sem
er trúlega nefnd í flestöllum köflunum en sérstaklega dregin fram í kafla Steinnar Örnu
Þorsteinsdóttur sem kallar kafla sinn Sjúklingafræðsla: símaeftirfylgd eftir hjartaskurðaðgerð.
Aukin þekking, tækniframfarir og ný lyf hafa lagt grunn að flóknari aðgerðum og
leiðum til að hjálpa veikari sjúklingum. Samhliða hefur hraðinn aukist í
heilbrigðiskerfinu og sjúklingar útskrifast nú mun fyrr og veikari en áður var. Mikilvægt
er að standa vel að útskrift og eftirfylgd sjúklinga til að árangur meðferða verði sem
bestur. Í kaflanum er fjallað um fræðsluþarfir hjartasjúklinga eftir aðgerð og um
eftirfylgd hjúkrunarfræðinga með símtölum. Höfundur veitti hópi sjúklinga slíka
eftirfylgd og var niðurstaðan að þó svo vel væri að útskrift staðið á sjúkradeild voru allir
sjúklingarnir ánægðir með símaeftirfylgdina og túlkuðu símtalið á þann veg að verið
væri að tryggja öryggi þeirra.
14
12
Herdís Sveinsdóttir, ritstjóri