Aðgerðasjúklingar liggja ekki aðgerðalausir II - Hirsla - Landspítali

175
Endursköpun á brjóstum
fullyrðingu þeirra og virðist sem fleiri rannsókna sé þörf á þessu sviði. Einnig vantar
fleiri rannsóknir um viðhorf einstæðra kvenna og ekkna um upplifun þeirra á
kynhlutverki sínu (Pelusi, 2006).
HLUTVERK HJÚKRUNARFRÆÐINGA Í AÐ VIÐHALDA JÁKVÆÐRI
LÍKAMSÍMYND
Flestar konur sem undirgangast brjóstauppbyggingu eru ánægðar með útkomu
aðgerðarinnar. Þó eru einhverjar sem ekki eru sáttar og enn aðrar sem sjá eftir því að
hafa farið í enduruppbyggingu. Upplifun kvenna á nýja brjóstinu er persónubundin sem
og sátt við það. Sumar tala um að þeim finnist sem brjóstið sé ekki hluti af þeim sjálfum
og þær vera með aðskotahlut í líkamanum. Þá tala einnig margar um að þær séu ósáttar
við breytingu á líkama sínum eftir aðgerð og sumar ganga meira að segja svo langt að
fara í aðra aðgerð til að láta snúa öllu ferlinu við, þ.e. að færa vöðvann aftur til baka þar
sem hann upphaflega var og fjarlægja sílikonpúðann (Boehmer o.fl., 2007; Wolf, 2004).
Segja má að brjóstauppbyggingaraðgerð sé fegrunaraðgerð í sjálfu sér. Nýja
brjóstið er gert í þeim tilgangi að bæta útlit konunnar (Abu-Nab og Grunfeld, 2007;
Fuller og Anderson, 2006). Í aðgerðinni er skorið á allar taugar og er því tilfinningin í
nýja brjóstinu ekki sú sama og var í brjóstinu sem var fjarlægt. Reyndar er stundum um
algert tilfinningarleysi að ræða og er það algengt umkvörtunarefni hjá konum (Boehmer
o.fl., 2007; Wolf, 2004).
Í tengslum við þetta verkefni var settur á fót óformlegur rýnihópur sem
samanstóð af 4 hjúkrunarfræðingum og 2 sjúkraliðum á lýtalækningadeild Landspítala.
Tilgangur hópsins var að finna leiðir til að styðja við jákvæða líkamsímynd kvenna sem
gangast undir aðgerð til endursköpunar á brjóstum. Þessi hópur hittist tvisvar sinnum; í
fyrra skiptið aðeins hjúkrunarfræðingarnir, en allur hópurinn í seinna skiptið. Notast var
við helstu niðurstöður þeirra greina sem þetta verkefni er byggt á og þær bornar saman
við reynslu okkar af viðbrögðum kvenna við brjóstnámi og brjóstauppbyggingu.
Niðurstöður voru eftirfarandi:
1. Fræðsla fyrir aðgerð um við hverju má búast eftir aðgerð. Meðal annars skert tilfinning eða
tilfinningaleysi á nýja brjóstsvæðinu. Sýna konunni myndir og benda á lesefni, þar á
meðal viðurkenndar vefsíður.
2. Gefa konunni færi á að tjá tilfinningar sínar. Nota 15 mínútna fjölskylduviðtalið (Wright
og Leahey, 2005). Það er, að bjóða konunni og fjölskyldu hennar upp á 15
mínútna samtal þar sem þau fá tækifæri á að tjá sig um áhyggjur sínar og koma fram
með spurningar. Einnig er gott að nota þann tíma sem fer í sáraskiptingar og aðstoð
við umönnun til að hvetja konuna til að tjá sig.
177
176