versione pdf - Sardegna DigitalLibrary

102
Niune naschet imparadu
Si times s’abba no andes a mare
-nât su dìcciu- ... ma tue dias chèrrere
cun d’unu brincu a Roma ‘e che fèrrere
chena perìgulu ‘e t’iscaminare!
Crês chi si potat un’arzola istèrrere
chena las ponner sas mannas a pare?
Atzender fogu chena unu luminu
o chen’isterzu a remunire ‘inu?
Perun’ómine naschet imparadu...
imparare però podimos tottu!
E s’at s’umanidade mezoradu
est ca, como a passu, como a trottu,
su caminu si l’at sempre agontzadu.
A tottu custu li nâmos “connottu”,
ch’in paragone est unu mare mannu
chi non revudat abba in die d’annu!
Da-e nudda -t’ammenta- naschet niente!
E sos mezoros còstana suores,
fadigas e istùdiu ‘e tanta zente,
samben, a boltas, corruttos, errores!
Ma sas conchistas, fruttu de sa mente
e de su coro, mannas o minores,
bonas che pane isfurradu restan
pro chie at tinu e nos ammonestan.
Non dudes, duncas, de intrare in giogu...
da’ s’arzola che frundi sa mundaza!
Ca solu chie tenet coa ‘e paza
dês timire de s’accurtziare a fogu!
E t’at a parrer finas disaogu
sa vida chi non passas traza-traza
che tantas chi si nd’ ‘iden cua e fue,
ca donzunu est faber fortunae suae!
SOS DÌCCIOS NON SUN... FAE