versione pdf - Sardegna DigitalLibrary

216
Si sos nuraghes esseran presones
e deo mere de cussas galeras,
de ch’inserrare faghia a maneras
a unas duas treghentas persones,
ma cun s’impignu ‘e la render libèras
addaghi aian postu a roddulones
sas pedras chi bi sun ammuntonadas
leendelas a mossu o...a istumbadas!
S’essera... su chi non so!
S’essera su preide ‘e cuddos puttos
sagrados, e de natura divina,
a bartza los faghia de carchina
e b’aia postu, presas che presuttos,
tottu sas limbas de mala genina,
a conca a giosso, pro cantare muttos...
cun sa promissa ‘e las torrare reas
addaghi aian chérfidu sas... Deas!
Si s’Orcu essera o sa Jana mazore
de sas tumbas chi ch’amos iscavadas
in roccas e granitos, cambiadas
in furros las aia e-i s’onore
de si che ‘ider intro collocadas
a cuddas mentes de nudda valore
aia dadu chi, in manera indigna,
si ch’ana isbagassadu sa Sardigna.
Si unu essera ‘e sos piccapedreris
chi at sas perdas fittas isculpidu
l’aia onzuna ‘oltada in ispidu
e, poi alluttu in chentu brajeris,
intr’ ‘e su coro a fortza felchidu
cun ambas manos a cuddos bragheris
concas de napa chi crên chi sos Sardos
sian tott’ arestes, legos e bastardos!
SOS DÌCCIOS NON SUN... FAE