versione pdf - Sardegna DigitalLibrary

32
Non faltat pena a chie est disdicciadu
Non faltat pena a chie est disdicciadu.
“Ch’est a narrer... a su toppu s’ispina!
-fit nênde Tzitzu ‘Irde a Mialina
in li mustrare su bratzu inghisadu-
Onz’ispiga at sa parte ‘e gianina,
su trigu meu est tottu bulvaradu!
S’in donzi trigu -naran- b’at mundaza
su meu est reste ebbia e solu paza!
Fortuna -nâchi- curret e non caddu!
A mie finas Murtinu m’est mortu.
Si chirco a unu, pro cosas d’importu,
o non l’agatto o mi pistat su ‘addu.
S’apo rejone mi dana su tortu,
si fatto ‘ene mi servit d’iscaddu.
S’ando a campagna mi chircan in bidda,
mi cojo e mi che fuit sa pobidda.
No agatto abba - crê’- si ando a mare!
In su puddarzu m’intrat su matzone,
a Pasca non mi campat un’anzone,
sos boes si m’iscorran ambos pare.
Sos fizos che los tenzo intr’ ‘e presone,
sas fizas fora ‘e domo a bagassare.
E si m’impicco sa fune si segat,
ca sa Morte pur’Issa si mi negat.”
“Faghe, Tzitze’, sa sorte, ‘ona o mala,
est dissignu ‘e su Deus meu e tou.
Nemos bi legget in s’ordinzu sou
e sighit s’istadea a s’altza e fala.
Chie non l’at in coddu l’at in pala...
Tue però... e proabei ‘e nou
cun sa fune a ponner s’iscummissa
a bider s’ ‘inches tue o perdet issa!”
SOS DÌCCIOS NON SUN... FAE