versione pdf - Sardegna DigitalLibrary

162
Filare in rucca anzena est malu itzu
Chie ‘e su mele d’àtere est liccardu
iscat chi non li durat cuss’abbitzu,
e chi dêt imparare prestu o tardu
a fagher da-e perisse! Nât su ditzu:
filare in rucca anzena est malu itzu!
A s’annu chi dêt pioer fa’ cun lardu
mezus però chi niune s’aisettet
ma chi comintzet cantu prima e... fettet!
Fettet... chen’esser mai presumidu
cun oju lìmpiu e coro sempre sanu,
prontu a su frade a porrer sa manu
addaghi che l’ischerat accassidu.
E s’in caminu s’ ‘iderat transidu
o cunfusu, a chie est pilicanu
pedat cunsizos, ca s’isperièntzia
balet cantu o pius de cad’iscièntzia.
Sos dìccios non sun fae... l’amos nadu
e galu ‘e cussos apat cunsideru,
ca sun siddadu mannu de abberu!
Chie caminat cun passu appuntadu
non ruet mai... e finas verdaderu
est su chi narat, sempr’attenoradu:
a’ cuddu chi su pagu non mesurat
finamentras su meda pagu durat!
Non cubit pane chie at facultade...
e su tribàgliu est sale e cundimentu
de sa vida, seguru fundamentu
de rispettu, de paghe e d’onestade.
E si aeret unu su talentu
de sighire vertude e veridade,
nàrrere diat poder:- Laudadu
siat Chie sa vida nos at dadu!-
SOS DÌCCIOS NON SUN... FAE