versione pdf - Sardegna DigitalLibrary

200
Boe solu non tirat carru
Pro Gósamu non b’at fulanu in mundu
chi contet che a isse... e nd’at rejone!
Ite li mancat? Tenet bonu... fundu,
benes e domos, paret un’Adone,
furriet a dresta, a manca, in largu, in tundu
b’at sempr’unu a li lingher su... garrone!
Sas féminas, a fragu de... nighele,
nâchi li curren che musca a su mele!
Finas si ‘antat d’aer ferramenta
chi non timet ruinzu ne ismarru
e chi mai l’at a fagher s’isgarru
de si cojare, nemmancu a... s’appenta!
Isse non nd’aggradessit partimenta!
Boe solu però non tirat carru...
e nât su dìcciu de non narrer gai:
deo ‘e cuss’abba non nde buffo mai!
Ma sa Sorte, addaghi intrat in gala,
s’accùrtziat che grodde a su puddarzu,
ca issa at duas caras, che frearzu,
bona sa prima, sa ‘e duas mala!
Como est che puddu infattu a Peppa Pala
a crista altzada e paret ch’in s’isgarzu
li currat a trainos sa salia,
ca cudda bi la negat sa... mundia!
S’àtera notte nâchi su zudeu
in domo si ch’est fertu ‘e sa teracca,
chi pro no esser ne sàbia ne macca,
li diat aer dadu su... recreu!
Gosa, Gósamu, gosa, gosu meu,
mira però chi non bi lasses tacca!
Gai dêt esser... si b’at chie in bidda
sa teracca la’idet già pobidda!
SOS DÌCCIOS NON SUN... FAE