versione pdf - Sardegna DigitalLibrary

110
A su mortorzu cùrrene sos corvos
Ancu ti curren che Giuanne Tolu
ch’imboladu si ch’est da’ una rocca!
Parias santa, ìnnida che fiocca
e finas cori-modde che crabolu!
Imbetzes nd’aias unu d’oriolu
su de m’ ‘ider per terra tzocca-tzocca,
su pe’ pro mi cattare in cannighile,
ca de sas viles ses sa pius vile!
Sos ojos ti nde ‘oghen a puntorzu,
ne ti goses sos benes chi mi furas,
ca l’as tue custu dulche... presorzu
chérfidu e trassadu... e fin lucuras!
Ma ses corvu... e che corvu a su mortorzu
ti ‘ettas como, allimida, e curas
soletantu su chi ti nât su coro
ch’est de píbera e malu che su Moro!
S’amparu tou fia, s’alapinna,
“s’ómine” ch’as sonniadu notte e die...
e sos annos ch’aia prus de a tie
nâchi fin... versos d’amorosa pinna!
E futtidu m’as cue! E pro a chie?
Como a s’àrvure rutta a fagher linna
curres cun sa ‘istrale e su pinnaccu
e rie-rie forsis mi nâs maccu!
In ódiu, a boltas, si ‘oltat s’amore...
e como l’isco, ca già t’apo amada!
In pedde anzena -nân- corria lada,
ma no est cussu ebbia s’amargore.
Est sa traittoria su dolore
o, mezus, su ‘e t’aer iscobiada
in trànsitos de morte. Ma t’ammenta:
sa Rughe est cun a tie a manu tenta!
SOS DÌCCIOS NON SUN... FAE