versione pdf - Sardegna DigitalLibrary

184
Màndiga a pagu e comparatinde
Màndiga a pagu e comparatinde...
ca a t’ ‘ider gai a su friga e busca
de sos mandrones s’istiga sighinde
sa cara como allegra e pustis fusca
b’at de ti narrer:- E birgonzatinde!
A su leone la faghet sa musca
-pensas tue- e cun cussu ti campas!
Ma gosat pagu chie vivit de trampas!
Tue crês chi su mundu est fattu ‘e legos
(e già che nd’at colpados, cun s’impannu!)
e gai die cun die, gesoccannu,
trassas e piscas, futtinde sos...tzegos!
Su trabàgliu? Assiat arrennegos!
Bàrriu minore remiarzu mannu...
chi s’istet chie est maccu in domo sua
e peus pro a chie est conca ‘e lua!
Ma no est sempre Pasca, crê’ a mie,
e donz’allega lompet a concluos
e tue e tottu as a bider su die
chi cuddos ch’istimais conchicruos
t’imparan a torrare in sensos tuos!
Ca in sa vida bi at sempre chie
ti n’ ‘ogat su macchine prima o poi,
‘ordinzes gai o meledes goi!
T’as a abbizare tando da-e per te
chi unu est musca, àteru est leone,
chi su pingu no est melalidone,
ch’esser teraccu no est ch’esser re!
E, s’a boltas, inghènias de matzone
dan calchi fruttu, no est cosa, crê’,
chi durat che Matusa o dat profettu,
ma ‘e pagu tinu, che giambare lettu!
SOS DÌCCIOS NON SUN... FAE