versione pdf - Sardegna DigitalLibrary

16
A boltas un’istrobbu ‘attit fortuna
Inte’, Pillonca, su bandu ch’in bidda
deris bettadu at su tamburinaju:
-Sennaresos, furadu sa pobidda
m’at a s’iscuja unu puddedru ‘aju.
Deo mi nd’accunorto de su raju,
ma sun sos fizos pistidda-pistidda
pro sa mama in prenettu e suddu mannu
timinde li sutzedat calchi dannu.
A boltas un’istrobbu ‘attit fortuna.
Già est gai... ma bae e ispiegabilis!
Issos pretenden chi su maccu ‘e Silis
chirca-chirca che pighet a sa Luna!
Chie cheret arantzu andet a Milis,
ma si de brùscia nde bramades una
deo bos dao lumen, sambenadu,
edade, intinnu, ratza e parentadu.
Braccotta ‘e petza, pro non narrer nana,
un’oju lerzu, s’àteru ‘e cristallu,
in pilucca, sas ancas che frullana,
mannas sas tittas che unu timballu;
s’alenu est putzinosu e sa cuartana,
si l’abbojades peri calchi ballu,
bos pítzigat, creide, che... tudones,
ca issa est fittiana ‘e sos vegliones!
M’azis a narrer: ello tue tzegu
fis incosciende sìmile iscurtone?
Tzegu pàbaru! E pro cuss’intregu
mezus fini trint’annos de presone
e-i su mezus cun su ‘addagone
segadu a trinchis! Ma de s’arrennegu
sa ‘e oe est s’ùltima forchidda:
muzere e giuos lèalos in bidda.
SOS DÌCCIOS NON SUN... FAE