versione pdf - Sardegna DigitalLibrary

58
Paràulas de ladru non nde crêttas
Paràulas de ladru non nde crêttas,
ca est zenia -cussa- ‘e castanzeris,
de caras de cannau, imprabastuleris,
chi sas fàulas bettan che saettas.
A cumbenènscia naran “cras” a “deris”,
lanzu che corru a chie at bonas pettas!
A s’àinu che boe nân corrudu
e finas ti lu ‘iuran chen’impudu.
Issos chen’aer buttega ‘e pannia
possedin seda, fresi e tertziopelu;
non sun bintrados mai in sagrestia
ma tenen òstias, candelas, vanzelu;
petta e casu lis falan da-e... chelu,
prenos didos e tuju ‘e oraria!
Che a porfia mustran sos dinaris,
ne an suddu ‘e sa die ‘e partiparis!
E si, in arréjonu, ‘e custu o cuddu
lis pregunteras chena ‘adare a male,
a ti risponder non lis ponet tuddu:
-Custu est regalu de compare ‘Odale,
cuddu ‘e Fulana, cussu ‘e tales... Puddu
chi fit su frade ‘e su tiu carrale
de sa sogra ‘e su póberu bisaju!-
Pone in bértula! Chentu e unu raju!
Carvone an issos chena fagher cheas,
bonas tramattas chena tunder lana,
abba nde buffan da’ onzi funtana,
mesa non frunin ma tenen cadreas.
E, si ti fidas, fintzas sas bideas
ti lean da-e conca a gana a gana!
Ma nât su dìcciu:- Da’ ladros lontanos...
su ladru l’abbaidade sempre in manos!-
SOS DÌCCIOS NON SUN... FAE