versione pdf - Sardegna DigitalLibrary

36
Mezus unu chivarzu in domo tua...
Mezus unu chivarzu in domo tua
chi non pane biancu in domo anzena.
-fit nênde Paulicu a Madalena
gioghende “a pira cotta e pira crua”- (*)
E tue ite nde nâs? A pane e atzua
ti piaghet a campare o a bentre piena?
S’intro ‘e domo non bi nd’as provvistas,
t’arrennegas, deunas e ti pistas!
Si m’agattera in tempos d’iscassia
finas foras lu chirco su recattu,
ca m’aggradat pienu su piattu
e no a mastigare sa salia.
Cun pan’ispeli e telau ebbia
ue si siat non m’intendo attattu.
E mascamente in domo, si pensera
ch’est nuda ‘e tottu e fritta che niera.
In domo sua -nâchi- est paba onzunu!
E siat puru... ma si non b’at chie
bustu e chena b’approntat die cun die,
paba lu giamas s’abbarrat deunu?!
Sa primma domo ‘e s’ómine, pro a mie,
est sa ‘entre... e non s’ispantet niunu!
Sa veridade no est che sa Luna
chi paret in su poju un’ateruna!
Una est pira, s’àteru est pirastru,
Chie cheret sorte la devet chircare
cun determinu, fide e atza umpare.
Coltzu, invece, a chie naschet in mal’astru,
ca si resessit a nde lu pesare
li ruet su palattu a unu disastru!
Sa domo est domo, emmo... ma su fadu
mudat, a boltas, chie giambat pradu.
SOS DÌCCIOS NON SUN... FAE