versione pdf - Sardegna DigitalLibrary

38
S’òmine chi de fémina si fidat...
Ahi dìccia, sa mia!... Un’ ‘attulina
daghi l’apo connotta mi pariat!
A sos carignos si mi tremaiat
che s’êrat bidu calchi mala avrina!
Sempre attaccada che un’erighina,
a perra ‘e gianna non s’acceraiat.
Maseda, cheja e domo, coro ‘e pudda,
daiat tottu chena cherrer nudda.
E deris... deris... che colpu ‘e fuette
già m’est faladu su raju a primore!
In sa mesa una punta de bugliette
cun subra iscrittu:-Amo su rettore!-
Da’ una rocca cheret chi mi ch’ ‘ette...
non b’at dinari chi paghet s’onore!
S’ómine chi de fémina si fidat
daghi drommit traittu si nd’ischidat.
Che-i sa mama at fattu, brùscia ‘etza,
e che’ sa donnamanna in assimizu.
Onzi fizu nde leat unu pizu...
tale sa pudda, a tales sa puddetza!
Accomi como che pische in sa retza
chena rimédiu postu in affoghizu.
Onzi linna at su tàrulu sou...
e finas custu est unu cumprou.
A mélidos, birbante, che crabitta
die e notte ‘antaiat a Babbai...
nâchi fit santu, chi fit goi e gai,
beneittu che-i s’abba beneitta!
Ismutzurradas como, che simmai,
s’agattet una e s’àtera... cabitta!
Nât su dìcciu: Amore e signoria
-già est beru- non cheren cumpagnia!
SOS DÌCCIOS NON SUN... FAE